Introducción
Siguir al oxetivu, roba-y la maleta, mirar si tien tinta invisible, unviar un mensaxe a la Central. Esperar nel parque a que venga'l mio contautu. Mirar que nun me sigan. Mirar que nun lu sigan a él. ¿Traicionaríanos? ¿Sedrá un axente doble? Da-y el maletín, la mano na pistola y de vuelta pal Lada que ta aparcáu en Pumarín.
Naide dixo que ser del KGB n'Uviéu o en Xixón fore fácil, pero agora, ye posible. Si visti The Americans, James Bond, La Vida de los Otros y Goodbye Lenin! vas ver que Depués d'Ochobre tien daqué de too eso y, tamién, de lo que-y quieras meter; pues ta fechu non solo pa encarnar a un axente del KGB, la CIA, el MI6 o'l CSID de Franco, sinón p'adautase tamién a partíes d'intriga, misteriu, investigación policial o combate.
¿Qué ye esautamente Depués d'Ochobre?
Depués d'Ochobre ye un xuegu de rol d'espíes que busca trayenos lo meyor de les histories de la Guerra Fría: la tensión, la infiltración, les dobles vides, los micrófonos tapecíos y los pasaportes falsos de milenta naciones na guantera del coche.
El sistema de Depués d'Ochobre ye llixeru busca representar esta tensión na que vive l'espía profesional, por eso plantegamos un sistema de combates rápidu y eficaz, lloñe de cualquier tipu d'epicidá. El nuesu sistema nun inclui namás la posibilidá de representar el dañu físicu sinón, tamién, l'estrés sicolóxicu y el dañu moral: P'algamar los nuesos oxetivo vamos tener que pasar nervios al cruciar un control de pasaporte con pasaporte falsu, va golenos un perru a la gueta d'esplosivos y, quiciabes, vamos tener qu'acostanos con una persona que mos da noxu o a la qu'odiamos. Toes eses coses tradúcense nun dañu sicolóxicu que'l nuesu sistema tresllada al papel.
L'ambientación que más desendolcamos foi la de la RSSA, pero ye perfeutamente posible xugar n'otros escenarios: Cataluña del Este, Cataluña del Oeste, una España que ta (o pue tar) a piques de ser el nuevu Vietnam... y ta pensáu pa xugar con espíes de tolos bandos y naciones... Y, tamién, pa les conspiraciones polítiques. Depués d'Ochobre ye un xuegu ambientáu nun estáu comunista (La URSS) pero nun ye un xuegu comunista: vais poder xugalu dende toles perspeutives y países que vos apeteza.
Anque'l sistema de gobiernu ye ríxidu y el propiu d'un sistema socialista de partíu únicu, lo cierto ye que na RSSA hai delles tendencies o facciones: Estalinistes, aperturistes, varsovistes, socialistes y hasta anarquistes y socialdemócrates (frutu de la xunión de la UHP), que van permitir que l'espionaxe nun seya una cosa namás que de los grandes estaos sinón que, tamién, seya posible facer histories de conspiración política nes estructures del Partíu.
Amás del gobiernu y les families polítiques reconocíes pol Estáu, hai delles fuercies polítiques "disidentes" na RSSA: Terroristes cristianos, independentistes asturianos, españolistes, demócrates-lliberales y bien d'espíes infiltraos.
Ideal pa entamar nel rol
¿Yes nuevu nesto del rol? ¿La primer vez que xuegues? Esti xuegu ta fechu pa ti entós: Tien trés capítulos dedicaos específicamente a les persones qu'enxamás xugaron a un xuegu de rol y cuenta con un sistema de xuegu de lo más fácil que premia, perriba de too, l'aspeutu más narrativu.
Si yá lleves años xugando al rol, vas atopar equí un sistema afayadizu pa facer una partida narrativa: prestosu y nuevu. Con dellos D6 y D8 tendrás abondo pa xugar y prometémoste que nun vas perder el tiempu en repetir milenta tiraes ente aición y aición. Les coses pasen apriesa cuando tienen que pasar en DDO. Si quies más información sobre'l sistema qu'emplega DDO, mira la entrada específica que punximos.
¿Qué voi atopar dientro de "Depués d'Ochobre"?
Dientro de DDO vas atopar lo que vien darréu:
Una ambientación de la República Socialista Soviética d'Asturies (RSSA): ¿Cuála foi la Historia d'Asturies ente 1934 y 1970? ¿Cuála ye la situación de la economía? ¿Cómo ta la política? ¿Qué movimientos culturales hai? ¿Qué disidencia llucha escontra'l gobiernu? ¿Cómo son les ciudaes, pueblos y llugares d'Asturies? ¿Qué ye y qué rellación tien con Asturies la "República Socialista Soviética Autónoma de Llión Norte"? ¿Cómo ye eso de que Fidel Castro s'entrenó en Somiedu? La parte d'ambientación aborda sistemáticamente la historia, la cronoloxía, la xeografía, la cultura, les llingües, los refuxaos españoles, la economía, el cine...
Dellos capítulos pa principiantes: Depués d'Ochobre va tener dellos capítulos específicos pa xente que nun xugó nunca al rol. En 30 minutos ponémoste a xugar.
Un sistema: Un sistema de xuegu totalmente nuevu basáu en reserves de dados D6 y D8 con ventayes y desventayes y una llista de nacionalidaes, habilidaes, carauterístiques, clases "sociales" y profesiones. Pues atopar más información tocante al sistema equí.
Personaxes predefiníos: Apurrímoste 6 personaxes predefiníos que trabayen pal KGB coles sos ilustraciones, histories personales y fiches. Pues emplegalos na aventura introductoria o n'otra que faigas, ideales pa la xente que nun quier aparase a pensar un personaxe.
Aventura d'entamu: Pa que nun tengáis que pensar la primera historia o, pa qu'entaméis adulces a metevos nel mundu de Depués d'Ochobre, esti xuegu vien con una aventura introductoria, la "Operación Povisa": Nel marcu de la Guerra Fría y de les polítiques de "averamientu", el Ministeriu de Cultura de la URSS y el Secretariu de Cultura de EEUU roblaron un programa d'intercambéu. Una compañía cinematográfica de Hollywood ta de camín a Mieres pa rodar un documental. La Central sospecha que pueden tapecer daqué y mándavos "acoyer a los güéspedes cola hospitalidá asturiana y soviética"
Stretch goals Sacantes los qu'escueyan el formatu "solo en PDF", el xuegu venrá con tolos stretch goals que se desbloquien en formatu físicu. Ten en cuenta que los stretch goals van ser solo pa la xente que participe nesti crowdfunding y merque'l xuegu en formatu físicu y nun van vendese nes tiendes a nun ser en suplementu.
¿Cómo ye'l llibru físicu de Depués d'Ochobre?
El llibru físicu de Depués d'Ochobre vendrá en formatu A4, con ilustraciones en blanco y prieto y la portada a color. Tien unes 120 páxines y a éstes páxines sumaránse-yos les que compongan les aventures, tresfondos y campañes que se desbloquien nos Stretch Goals.
Hai tamién posibilidá d'alquirilu en tapa dura mercando la Orde de Lenin.
N'acabando la campaña de crowdfunding contautarémoste pa saber si quies el llibru n'asturianu o en castellán.
¿Cómo ye la RSSA?
De mano, la RSSA ye un estáu socialista, parte de la URSS y, anque la capital sigue siendo Uviéu, la ciudá más grande de toes ye Mieres: trubiecu de la Revolución y, xunto con Hollywood, la ciudá más importante pal cine mundial. Del Avilés que conoces nun queda nada: invadiólu l'Alemaña Nazi tres del desembarcu de Xagó en 1942 y agora ye ún exemplu de l'arquiteutura comunista d'un movimientu que na historia del arte conozse como "Grandonismu". Xixón ye xunto con Vladivostok y Sebastopol ún de los principales puertos militares de la URSS y un llugar nel qu'aparen davezu los somarinos nucleares Clas Navaga que patrullen l'Atlánticu.
Les fronteres tán zarraes, los ríos Eo y Deva enllenos de mines, la propiedá de los medios de producción expropiada, la sidra sigue bebiéndose pero tamién el vodca de mazana. Los comisarios políticos esisten, hai atentaos terroristes d'espíes franquistes y el KGB fai redaes de xemes en cuando pa desenmazcaritar a los de la CIA. Esto ye Asturies, pero ta mui cambiada.
¿Qué s'entiende por "ambientación de la RSSA"?
Igual convién ser claros nesti puntu. Cuando falamos d'una ambientación de la RSSA nun mos llendamos a describir les instituciones, el clima social y los principales problemes qu'hai na RSSA.
Una historia dtallada del períodu 1934-1970. Como si fore un llibru de testu d'un país que nun esistió, una bona parte del tresfondu de RSSA implica facer una historia del periodu 1934-1970: Les guerres, les lluches, les maniobres polítiques... pero tamién los descubrimientos y los eventos d'importancia.
La cultura y la historia de la cultura. Na ambientación de la RSSA vais descubrir cuálos fueron los movimientos culturales d'Asturies de 1934 p'acá: Los escritores más famosos, les noveles más vendíes, les películes más taquilleres, los grupos, los coros, los cantares...
La política. Entendiendo por política cómo s'organicen les instituciones asturianes, cómo s'organiza la UHP-PCUS, cuáles son les families polítiques llegales ya illegales... etc.
La ciencia. ¿Qué descubrimientos se fixeron n'Asturies? ¿Qué hospitales hai? ¿Qué científicos famosos hai? ¿Hai dalgún premiu Nobel? ¿Pasó dalgo col Uraniu?
Les batalles. Falar d'historia ye tamien falar de lo militar del rol del exércitu, de la mentalidá, de les fricciones ente lo militar y lo civil...
Y un llargu etcétera.
¿Qué roles tienen los xugadores?
Depués d'ochobre ta pensáu pa desendolcar histories d'espíes. Un axente del KGB formáu na academia de Moscú, una inxeniera reclutada pa un proyeutu secretu, un actor vividor obligáu a espiar si quier siguir cola carrera... Pero tamién ta pensáu pa facer otru tipu de partíes: Americanos qu'intenten entrar n'Asturies y tener identidaes falses, un asturfrancés que ye axente doble, un oficial de policía encargáu d'investigar a un asesín en serie en Xixón, una conspiración nel Soviet Supremu...
ADD ONS o Amestaos (Requieren el xuegu base)
Los Add on o amestaos, son aventures p'ampliar l'universu de Depués d'Ochobre. Presentamos básicamente ún: "Madrid atado y bien atado. Oxetivu: Matar a Franco". Que tien dientro trés coses mui estremaes:
Madrid atado y bien atado: Ye una campaña curtia na que los xugadores tendrán que facer llabores d'espionaxe políticu. Esta campaña tien más de conspiración política que d'aición, y nella, los xugadores interautuarán colos principales llíderes de la disidencia y l'establishment español: Los partíos o embriones de lo que más tarde seríen la UCD, el PSOE, Carrillo, Líster, Adolfo Suárez, el Príncipe Xuan Carlos... L'oxetivu del add on "Madrid atado y bien atado" ye remanar la política española p'algamar lo meyor pa los intereses de la URSS: En cuenta d'una Transición a la Democracia, facer porque heba una Transición al Socialismu. Como dicimos, tien más de "fiesta na embaxada" que d'operación militar secreta
Oxetivu: Matar a Franco: Esta ye una aventura curtia que pue xugase de mou independiente a "Madrid atado y bien atado" o - lo que nós aconseyamos - xugala como un "spin off" de la campaña principal. Nun momentu de la trama política de "Madrid atado y bien atado", pasar a llanzar "Oxetivu: Matar a Franco". Equí, l'aventura céntrase na xera que desendolca un comandu de republicanos españoles, asturianos soviéticos y independentistes vascos que busca algamar un oxetivu común: Matar a Franco. Los xugadores tarán énte una aventura d'infiltración y espionaxe clásica na que lo más importante ye cumplir l'oxetivu y salir con vida de Madrid.
Tresfondu d'España: España camudó muncho y l'Estáu Franquista de Depués d'Ochobre 1970 poco tien que ver col de la realidá. En 1961, cola crisis de Berlín, el gobiernu nel exiliu de la República partióse en dos: El Gobiernu de la República Española y el Gobiernu de la República Popular Española, d'ideoloxía abiertamente comunista. Mientres que'l primeru siguió exiliáu en México, el segundu opera dende Llanes. Ye la época de los maquis que nun se rindieron pero ye tamién la época de Radio Pirenaica la radio lliberal demócrata y republicana y Radio Cantábrica la radio dende la que'l Presidente Líster s'empobina a los ciudadanos españoles.
NOTA: "Madrid Atado y bien atado", "Oxetivu: Matar a Franco" y "Tresfondu d'España" son trés coses que formen parte del mesmu add-on que pues garrar en formatu físicu (18€), siempre que tengas el llibru básicu físicu de Depués d'Ochobre o en PDF (10€), siempre que tengas al menos el PDF de Depués d'Ochobre.
Los "Stretch Goals" ó "Oxetivos d'allargamientu"
Depués d'Ochobre precisa de 2.500 Euros pa poner nes tiendes una pequeña y primer edición. Pero a nós prestaríanos muncho poder enantar l'universu de Depués d'Ochobre con histories, personaxes, ilustraciones, ambientaciones... que faigan vivir esta dómina dorada del espionaxe soviéticu. Por eso, si perpasamos la llende de los 2.500 euros, plantegamos amesta-y al xuegu delles coses.
IMPORTANTE: Los stretch goals o llogros d'allargamientu nun van tar disponibles na edición en tiendes, sinón únicamente pa les persones que participaron nel crowdfunding. Si se saquen a la venta en tiendes, sedrá nun suplementu. Por eso, si punxisti perres, interésate que les ponga más xente y asina lleves un xuegu más completu. ¡Nun duldes n'esparder la nuesa iniciativa!
2.500 €: Depués d'Ochobre sal al mercáu n'asturianu y en castellán. LLOGRU DESBLOQUIÁU
3.000 €: Mapa: Vas recibir el llibru físicu de Depués d'Ochobre acompañáu d'un mapa nel mesmu formatu que'l llibru totalmente a color. LLOGRU DESBLOQUIÁU
3.500 €: Poster de propaganda: Vas recibir el llibru físicu de Depués d'Ochobre acompañáu d'un poster de propaganda soviética especialmente diseñáu pal xuegu. LLOGRU DESBLOQUIÁU
4.000 €: Aventura: In nomine Secretari et Partis: una aventura escrita por Álvaro Aranguez con escenes n'Asturies y Roma na que se fragua'l nomamientu del primer obispu soviéticu. LLOGRU DESBLOQUIÁU
5.000€: Aventura: The Asturians: ¿Visti la serie "The Americans"? Pos esto ye igual pero al aviesu. Nesta aventura los personaxes son axentes anti-comunistes qu'han de llevar una doble vida y facese pasar por asturianos del montón. Vivir nuna colomina o nuna casería, dir al economatu peles mañanes y, pela nueche, robar los planos del nuevu somarín nuclear asturianu o poner una bomba nel Aeropuertu. LLOGRU DESBLOQUIÁU Desplicámoste esta aventura equí.
6.000: Aventura: Clas Navaga: El clas Navaga nun ye solo'l somarín nuclear más poderosu de la URSS en 1970, ye tamién l'escenariu d'esta historia escrita por Iván Salcedo que trescurre dafechu dientro d'un somarín d'estes carauterístiques. LLOGRU DESBLOQUIÁU
7.000: Aventura y tresfondu: El sable colorao de Xagó: Avilés, 1942; la ciudá d'Avilés ta ocupada poles tropes nazis y la población llocal tien que resistir emplegando métodos de subversión, propaganda, guerrilla... ¡y espionaxe! Esta historia llévate a los años 40 y al episodiu que más buelga dexó nes conciencies de los asturianos. ¿Vas poder escapar de la Gestapo?. LLOGRU DESBLOQUIÁU
8.000: Más propaganda soviética: En llegando a los 8.000 €, vamos a dar a col llibru en formatu físicu otru poster a color del mesmu tamañu que'l llibru d'una d'estes nueves aventures. LLOGRU DESBLOQUIÁU
9.000: Ilustralo too: En llegando esta cantidá, vamos ilustrar toles histories anteriores atención: esto enantará'l pack "propagandista". LLOGRU DESBLOQUIÁU
10.000: Muerte nel Soviet Cimeru: Murmuróse y comentóse muncho que la muerte de Belarmino Tomás nun foi natural, que tenía enemigos en Moscú que lu queríen quitar d'en medio. Nesta aventura, los xugadores vense metíos nes conspiraciones internes del XX Congresu del PCUS (el que des-estalinizó la URSS): ¿Vas ser tu'l que mate a Belarmino o'l que lu salve?. LLOGRU DESBLOQUIÁU
11.000: Aventura: Les flores na ventana: Qué s'escuende tres de les flores d'esa ventana? ¿Quién ta mirándomos? Una aventura que s'avera al enigma y a los antiguos métodos de comunicación del espionaxe nun barriu cualquiera d'una ciudá asturiana. LLOGRU DESBLOQUIÁU
12.000: La Batalla del Cantábricu (aventura+mod): La Batalla del Cantábricu ye un sistema específicu pa que los xugadores puedan facer combates somarinos, faciendo toos parte d'una mesma tripulación. Amás, vien cola aventura "Batalla del Cantábricu", un combate somarín del que nun se faló nada nin se mencionó nada en nengún mediu de comunicación a últimos de los 60.
13.000: Aventura: Operación Tibicenas, diaños del desiertu:: Aisllaos, renegaos y condergaos al fracasu, un grupu d'operaciones especiales enfréntase a la xera imposible d'infiltrase nuna base naval ameriacna en territoriu canariu. La más dramática, murnia y cruel de toles nueses aventures, fecha por Vicente Gozálvez Perera.
14.000: Ilustraciones: Vamos ilustrar Muerte nel Soviet, Les Flores na ventana, la Batalla del Cantábricu y Operación Tibicenas.
15.000: Tresfondu: Barcelona, seutor soviéticu: ¿Qué pasó con Barcelona y Cataluña depués d'ochobre de 1934? "Barcelona: Seutor Soviéticu" ye un tresfondu y una historia de Cataluña y de cómo esti país quedó dixebráu na República Catalana y la República Popular de Cataluña. ¿Sabes lo que ye'l Checkpoint Carles? Nestes páxines desplicámostelo.
16.000: Barcelona Escura: Una aventura ambientada nuna Barcelona dividida fecha por Alba À. Holgado na que les idees anarquistes vuelven a ser importantes.
17.000: Poster a color (A4) basáu en Cataluña de baldre pa toles persones que tengan el llibru físicu.
18.000: Los Crímenes de San Llorienzo: Un asesín en serie anda sueltu per Xixón y la policía nun ye a prindalu. ¿Consiguirálo'l KGB?
19.000: Ilustraciones: pa "Barcelona, seutor soviéticu", pa l'aventura. Atención: esto enantará'l pack "propagandista".
20.000: Tresfondu y aventura: Primero d'Ochobre: Primero d'Ochobre llévanos a setiembre de 1934. Una revolución nun ye dalgo que s'improvise y les operaciones secretes tán a la orde del día pa permitir qu'entren les armes y s'organicen los planes. L'oxetivu nesta historia ye conspirar pa poder organizar la Revolución del 34.
25.000: Plutoniu en bolsu, Aventura: Plutoniu en bolsu ye una aventura de misteriu ambientada na AVTN (Área Vetada de Tinéu-Navelgas) una zona onde tán asitiaos los dos únicos reactores nucleares en suelu asturianu y a la que la cinematografía llama "L'Área 51 soviética".
30.000: Depués del muru: Asturies, 1991. El muru de Berlín ta pa cayer y, con él, el socialismu. Asturies nun ye una esceición a esto... ¿O sí? Depués del muru píntamos una transición a la ¿democracia? nuna Asturies a la que Washington ve yá na OTAN. Lo único que ta claro ye que'l ministru de cultura de la RSSA quier participar nel festival d'Eurovisión. ¿Qué pasará?
Tocante a les recompenses
En Depués d'Ochobre plantegamos un sistema de recompenses fácil d'entender: Toles persones qu'aporten pa la campaña saldrán nos agradecimientos (a nun ser que nun quieran salir). Eso sí, saldrán en función de la cantidá de dineru qu'aporten.
Los stretch goals van tar solo disponibles pa les persones que merquen un pack col llibru base físicu.
Tapa dura: Si mercasti un llibru físicu, pues facer que tenga tapa dura mercando la Orde de Lenin.
Add-on Madrid atado y bien atado. Oxetivu: matar a Franco: Ten en cuenta que pa poder mercar esti add-on en formatu PDF, fai falta tener el xuegu base en PDF o físicu. Pa poder mercalu en físicu, fai falta tener el xuegu bas en físicu.
Quién somos
Nicolás Bardio ye traductor y escritor - el novelista más mozu en llingua asturiana - y xuega al rol dende va cuasi dos décades. Tien asoleyaes dos noveles "Sol Reló" (Trabe 2008) y "Cuando ensamen les abeyes" (Suburbia 2011)
Xon de la Campa ye ilustrador y tien ilustraes obres como la torna al asturianu de "Drácula" y de "La Celestina"
A qué vamos destinar les vueses aportaciones
ISBN: Códigu pernecesariu pa sacar cualquier llibru al mercáu.
Imprenta: La mayor parte del dineru que saquemos va dir a pagar la impresión física de los llibros.
Maquetación Nin Xon nin yo somos maquetadores, polo que vamos tener que cuntar con un maquetador profesional.
Recompenses: Les recompenses tamién cuesten lo suyo.
Gastos d'unviu: Probablemente xunto colos gastos d'imprenta, el capítulu más grande de toos (y mui especialmente pa tolos unvíos que nun son llibros)
Publicidá: Vamos facer campaña en redes sociales p'amosar a la xente qué ye Depués d'Ochobre mientres facemos el crowdfunding y depués. Facer publicidá va implicar tamién dar exemplares de baldre a periodistes y demás.
Tresporte: Nun falamos d'unviavos les recompenses sinón, de distribuyir les primeres ediciones n'asturianu y castellán d'esti llibru.
Calendariu previstu
La nuesa intención ye que tengáis les recompenses y el restu de coses lo primero posible pero, como ye la primer vez que facemos un retu lloxísticu d'estes carauterístiques, quiximos más nun mos pillar los deos y fixar Mayu de 2020 como la fecha final; anque lo más probable ye que salga enantes.
En tou casu, comprometémonos a unviavos el PDF col xuegu base (los stretch goals vendrán nel físicu) en cuantes que lu tengamos, pa que vaigáis yá abriendo boca y xugando.
ATENCIÓN: Esti calendariu básase na suposición de que nun salieren los Stretch goals, si hubiere munchos stretch goals que sí salieren, el plazu podría retrasase dellos meses.
+ Info
Podéis siguir toles novedaes del proyeutu na páxina facebook del autor
Nel nuesu instagram https://www.instagram.com/rssasturies/
O podéis contautanos en Twitter a @gurriapu y @nbardio cuando vos pete
21 comentarios
If you are already a sponsor, please Log in to comment.
Jose Luis Garcia Bugallo
Pillo el básico en foto finish. Enhorabuena por la magnífica idea que has tenido, me ha gustado mucho.
MMnendzDz
¡Puxa la RSSA!
Ediciones Radagast
Author
60-40 mantenerlo cómo está ;)
yeray
Al final que salió de resultado en el referéndum?
Varo Fueyo
Ya tamos metíos dafechu!! Munches ganes de entamar a xugar peles tierres catalanes!!
Ediciones Radagast
Author
Munches gracies kia_astur! Esperamos que vos preste!
kia_astur
Proyeutu perguapu, muncha suerte rapazos!
Luisev
Perlora tiene que ser un campismo, tipo Cuba sí o sí! y Manolín de Llorío tiene que ser Héroe de la Unión Soviética sí o sí.
migueljbr
BRAVO!!!!!
Ediciones Radagast
Author
Hola Migueljbr!
Pues sí. La idea es que tengamos una web en la que podamos tener un foro para que todas las personas puedan compartir ideas, historias, personajes... y también podáis encontrar grupos físicos y telemáticos para jugar a DDO en asturiano o en castellano.
Y la idea es seguir alimentándolo ¡Claro! Fíjate todos los stretch goals que hay (aún sin desbloquear) ideas hay millones :-)