A nova páxina web de MENTIS

Ophiusa representou o primeiro paso para o noso proxecto. Grazas a vosa axuda non só verá a luz o xogo de Ophiusa, senón que MENTIS comeza a traballar en novos xogos cunha nova e orixinal liña de traballo. Xogos para o intelecto, imaxinativos, creativos e artísticos. O noso obxectivo é expandirnos máis aló das fronteiras do país.

Nestes intres estamos traballando na páxina Web que verá a luz a finais de novembro. Manterémosvos informados.

PD: Pouco menos de 44 horas para o remate da campaña e acabamos de acadar o noso segundo obxetivo. Non haberá ninguén que se anime a dar un novo impulso?

RECTA FINAL

Xa entramos na recta final da campaña. O primeiro darvos as gracias por facer posible este proxecto, e anunciar a nosa presencia no Culturgal deste ano, a gran feira da cultura galega, que terá lugar entre os días 5 e 7 decembro no Pazo da Cultura de Pontevedra. Alí estaremos presentando o proxecto e facendo partidas demostrativas. Aqueles que queirades achegarvos seredes benvidos.

VIDEO DISPOÑIBLE: Unha ollada as cartas.

Xa podedes botarlle un ollo á maqueta previa e coñecer a distribución das cartas.

En breve, o titorial do xogo.

PRIMEIRO LOGRO: CONSEGUIDO!!!

Moitísimas grazas polas achegas, a difusión e o apoio de todos.

Ophiusa xa é unha realidade. Agora a polo seguinte obxectivo: Facer unha boa tiraxe e distribuílo nas librarías do país, así que o novo reto serán 1999€.

Para conseguilo queremos engadir unha recompensa moi especial, tanto para aqueles de vos que xa aportáchedes como para aqueles que desexen unirse o proxecto.

Cada xogo incluirá a maiores tres cartas mestras, unha por cada cor principal: Vermello, azul e verde. Estas cartas virán en branco para que as poidades personalizar cun acontecemento importante do voso entorno: unha data histórica da vosa vila, o voso aniversario, o día da estrea de Songoku... As cartas poderán ser usadas no xogo como substitución dos tres comodíns.

Ophiusa: A terra dos mil ríos.

É un xogo de cartas para tódalas idades.

Componse de 54 cartas que representan varios dos acontecementos máis destacados da sociedade, a cultura e a política galega. Aínda que non é preciso ningún tipo de coñecemento previo da historia para poder xogar.

Ophiusa, ademais de ser un entretido xogo de mesa, tamén desenrola unha importante labor didáctica, que axudará os xogadores a organizar cronoloxicamente os seus coñecementos da historia.

Quen somos?

Moitos xa nos coñecedes, somos Fernando M. Cimadevila, editor de Contos Estraños e autor de libros como "O mundo secreto de Basilius Hoffman" ou a serie infantil "As aventuras do Apalpador", e José María Picón, ilustrador e fotógrafo, que realizou múltiples capas tanto para Contos Estraños e Urco editora como para outras editoriais de fora do país, ademais de ter un bo feixe de capas para discos de música ás súas costas.

Xogando a Ophiusa:

A mecánica de xogo de Ophiusa está baseada nos dous xogos de mesa máis populares do país.

Por unha banda temos o tradicional xogo de naipes, onde os xogadores deben escoller a carta que xogar dende a man.

E por outra parte, temos a estratexia posicional do dominó, onde as cartas deben ser colocadas seguindo unhas regras baseadas na súa data histórica e nas cores das propias cartas.

O obxectivo do xogo será facerse co maior número de cartas ao final da partida,.

Nesta, cada xogador representa unha provincia, e as cartas que correspondan a estas provincias, valen o dobre para ese xogador.

Tamén hai cartas especiais, como son os comodíns, que permiten ser xogadas sen ter en conta a súa data histórica.

A que destinaremos as vosas achegas.

Serán destinadas a impresión do xogo, así como dos pósters cronograma e os adhesivos. O material será de alta calidade imprimindo en cartón especial de naipes de 300Gr. Os pósters serán en tamaño A3 e incluirán unha cronografía dos acontecementos históricos.

Calendario previsto

O xogo atópase completamente rematado, polo que no prazo de 30 días unha vez finalizado o crowfounding recibiredes as vosas recompensas

+ Info

Facebook de Ophiusa