Elelelos: músicas de tradición oral no Concello de Bueu

#01 / Por que 3.600€ como obxectivo?

Ocórrensenos dúas boas preguntas que podedes facervos co cambio de obxectivo e que cremos importante aclarar, para evitar malentendidos e marmuracións, ;).

*1. E por qué precisades 3.600€?

1. Entón, por qué antes puxestes 1.600€ como obxectivo?*

1. E por qué precisades 3.600€?

Porque é o custo real que nos leva facer o proxecto de dobre cedé Elelelos. E podémosvos asegurar que cústanos só iso... tirando moooito de amigos, abusando de confianzas e buscando os prezos mínimos e aforrando en todo o posible. Velaquí un resumo de en qué marchan os cartos e en qué NON os gastamos:

En qué marchan os 3.600€

- 1.600€: vanse en todo o traballo de gravación, mesturas, masterización e arranxos das recollas. Son varios días de gravación en estudo (iso que xa aforramos unha chea usando instalacións do Concello de Bueu ás que cada día tiñamos que levar todo -micros, mesa de mesturas... todo-), e moito tempo dun técnico de son (Isaac Millán) poñendo todo xunto, e bonito. Co engado de ter que dixitalizar moooitas horas de recollas de campo, despedazalas e, nas escollidas, melloralas no posible.

- 1600€: É o prezo que supón facer fisicamente as mil copias dos dous cedés que temos previstas e que nolas envíen.

- 400€: O custo de deseño, maquetación e, en definitiva, impresión e feitura do libreto onde estaredes mencionados os mecenas. Buscamos que non sexa unha carilla cutre, senón un libriño de 16 caras (en principio) onde se poida poñer en valor algo da información do contido dos discos.

En qué non van os cartos:

• NON queremos os cartos para pagar aos músicos que participan no cedé, nin a produtor, a pesar de tantas e tantas horas e desvivires que lle puxeron ao proxecto.

• NON van para pagar mariscadas nin merendas, nin as bebidas ou cruasáns que mercabamos para sobrevivir a calor e as horas no estudo de gravación.

• Nin tan sequera van no deseño da camisola ou no vídeo de lanzamento, que tanto Luís Davila como Gaspar Broullón, aos que lles estamos tremendamente agradecidos, colaboraron altruistamente, converténdose ao seu xeito (e menudo xeito) tamén nos nosos mecenas, contribuíndo coa súa arte.

2. Entón, por qué antes puxestes 1.600€ como obxectivo?

Porque en Verkami, cando pos un obxectivo, se non o acadas, non cobras nada de nada. Se quedasemos en 1500, ninguén pagaría nada. E nas nosas contas, aínda sabendo que o custo eran 3600, o que tiñamos claro é que polo menos polo menos, necesitabamos 1600 para poder pagar o proxecto e saír. Doutra maneira, igual quedaba gravado pero sen poder facer os cedés físicos nin poder distribuílo.

Por iso marcamos como obxectivo inicial os 1600€, o mínimo necesario para poder avanzar. Agora, coa tranquilidade que dá saber que se farán, e que todo o que nos acheguedes xa se recibirá, ampliamos ao obxectivo do prezo real do proxecto.

Tamén foi, por que negalo, que tampouco tiñamos claro o que poderiamos reunir deste xeito e daba moita vertixe poñer 3.600€ así de primeiras... Pero superastes todas as nosas previsións. Graciñas!!

PD: E apuntamos outra pregunta: E, se acadamos os 3.600€, acabouse?

Pois non! De soños tamén se vive, non? E o noso soño sería acadar ese obxectivo e dicir: pois se logramos algo máis... Elelelos gravará un videoclip! Pero isto aínda é só un soño...

Axudádesnos a facelo realidade?