///// EQUÍ TÁN... ESTOS SON ///// DÉCIMU ANIVERSARIU DE GAITEROS DEL CARBÓN

Sobre'l proyectu:

Gaiteros del Carbón somos una banda de les cuenques mineres qu'en 2026 facemos 10 años. Queremos celebrar esti aniversariu como se merez, con un conciertu especial, una esposición que recueya la nuesa historia, y unos detalles conmemorativos pa recordar esti camín.

Dende fai una década compartimos actuaciones, emociones y momentos únicos. Agora queremos mirar atrás con arguyu y celebralo con toles persones que fixisteis posible esta aventura: el públicu, los collacios y les collacies y tola comunidá que nos acompaña dende’l primer día.

Col to sofitu vamos poder:

🎶 Facer un conciertu especial con collaboraciones y un repertoriu cargáu de memoria.

🖼️ Crear una esposición con semeyes, vídeos, recoyida de recuerdos y anéudotes d’estos 10 años.

🎁 Preparar material conmemorativu (camisetes, almanaques, gorres, botelles de sidra...) pa recordar esti momentu tan importante.

Cada aportación, por pequeña que seya, acércanos un pasín más a facer realidá esti homenaxe a tol camín percorríu xuntos.

¿Anímeste a collaborar? Si entá nun lo tienes claro, sigue leyendo...

Sobre les recompenses

¡Echa una güeyada a les recompenses!, Hailes dende 10€ hasta 250€ pero, si quies, tamién pues facer una aportación ensin recompensa.

Nesta campaña podrás facete con detalles especiales del X Aniversariu de Gaiteros del Carbón:

🖼️ El póster diseñáu por Sergio Llunik, firmáu pol grupu y con mención del to nome nes redes sociales y na web de Gaiteros del Carbón.

👕 Camisetes y gorres bordaes.

🍪 Migayes de Pozu y Son, unes galletes diseñaes y feches a costa fecha pa la ocasión, xunto col fatu mineru y la toballa conmemorativa, n'edición llimitada.

🎟️ Visites al Ecomuséu de Samuño, almanaque especial y, pa los más rápidos, cascu mineru, sidra y grisú del Pozu Fondón.

Toles recompenses tán preparaes con ciñu y pensaes pa compartir esti momentu tan especial.

💛 Dalgunes recompenses son llimitaes, asina que nun tardes en escoyer la tuya.

Quiénes somos

Hai frases que marquen un destín. La nuesa historia nació d’una d’elles. Na Cabalgata de Reis de 2016, ente instrumentos y cascos de la mina xuntáronse les pieces: así nacieron Gaiteros del Carbón.

Dende esi momentu, la ilusión prendió la mecha.

Un grupu de músicos que, ensin tiempu pero con toles ganes, decidió reivindicar la música asturiana de raíz y l'arguyu mineru que nos corre poles venes.

Debutamos acompañando a Celtas Cortos, y dende entós nun paramos: fiestes, festivales, premios, bodes, antroxos, cabalgates, rallys, trails, alcuentros y collaboraciones con artistes como Marisa Valle Roso, Los Berrones, Dixebra…

Pero lo más importante ye lo que nació al traviés d’esta esperiencia: una familia, un grupu de persones que medren xuntes, que comparten música, trabayu y compromisu.

Gaiteros del Carbón ye más qu'una banda:

Ye’l soníu d’un pueblu que recuerda d’ónde vien y sema futuru con arguyu.

💰 Pa que son les perres...

La campaña servirá pa financiar la esposición del X Aniversariu, con semeyes en paneles, vestuariu y recuerdos de la nuesa historia; el conciertu especial, con soníu, lluces y una producción musical orixinal; y la creación de productos conmemorativos como camisetes, gorres, almanaques, pósters, botelles de sidra o detalles artesanales fechos pa la ocasión.

Cada aportación ayuda a que esti décimu aniversariu seya la celebración que Gaiteros del Carbón y tola so xente merecen. ¿Échesnos un gabitu pa qu'esto seya realidá?💛

Calendariu previstu

Les recompenses puen recoyese en Llangréu, recibise a domiciliu o, si ye’l casu, entregase directamente polos y les componentes de la banda a les persones que conozan.

+ Info

• Sigue'l proyectu tamién en Instagram

• Tamién tamos en Facebook

• Y en Tik Tok

• Y tenemos WEB