La Guerra La Xoya, un nuevu universu de xuegos por vinir.

La Guerra La Xoya ye un xuegu cartes billingüe ast-cast, de 2 a 6 xugadores, onde tendremos que vencer a los nuesos rivales pa facenos definitivamente col Lknvas, La Xoya. Un xuegu nel que tamién podremos xugar por equipos arrepresentando les trés facciones de la hestoria: La Protectora Lill, Los Tomaricanos y Los y Les Siguidores de Nuna.

Consta de 10 tipos de cartes con atributos específicos que tendremos d'igualar o superar, sacantes que la carta mos indique otra cosa. Un xuegu cenciellu d'entender, pero onde esiste marxe pa la estratexa y la sorpresa. Recomendáu pa mayores de 12 años.

El xuegu ta ambientáu nun eventu pasáu de la Narrativa d'Hestories de Seda, un xuegu más complexu, con narrativa, tableru, cartes, figures... que s'editará nel añu 2024. Hestories de Seda provién d'un xuegu rol creyáu pol autor, Pablo M. Testa, en 2014 dientro d'un universu nel que vien trabayando dende'l 2006. La Guerra La Xoya ye un elementu más, una forma concreta d'acceder a esi universu dende un formatu específicu col que pasalo bien, y collateralmente dir xunciendo pieces col resto d'elementos creativos.

Les propies instrucciones servirán pa contestualizar debidamente'l xuegu, y servirá tamién como pista pa quienes tiempu dempués xueguen a Hestories de Seda.

¿Quién ye l'autor del xuegu?

El xuegu ye una idega orixinal de Pablo M. Testa. L'autor entamó nel añu 2006 a escurrir lo que güei entama de manera oficial. Una riestra conteníos entellazaos, dos xuegos, ún d'ellos con narrativa,y dos noveles. La Guerra La Xoya ye una creación que mos abre esi universu por venir de manera cenciella con un xuegu cartes perafayadizu. Esti xuegu básase nun eventu pasáu na Narrativa d'Hestories de Seda y mos aidará a averanos a él.

Pablo ye Dr. n'Hestoria y Coordinador del GIMEC. Músicu en dellos proyeutos como Bimenes UnderPrau, El Persianas & Los Influencers Muertos, Acid Flores o The Rumbaos.

"Lo bono d'esti puzzle ye que pues acceder a él dende cualesquier de los conteníos, y dir xunciendo pieces haza cualesquier direición, sacantes La Guerra La Xoya que ye un eventu pasáu dientro de la Narrativa d'Hestories de Seda, el resto de conteníos son ceotáneos ente sí".

¿Qué ye Acuto Xuegos?

Acuto Xuegos ye una iniciativa qu'entamó n'abril de 2019 pa la creación de xuegos y xuguetes n'asturianu. Dende entós a güei tenemos espublizaos 5 xuegos n'asturianu, tres d'ello escosaos, unu n'eonaviegu y otros dos en gallegu.

Esta ye la cuarta campaña de mecenalgu que facemos. Primero d'esta ficimos dos campañes pa espublizar dos de los nuesos xuegos en gallegu y otra pa espublizar el ¿Cuála ye? El Xuegu de Preguntes d'Asturies, un xuegu trivial d'Asturies y n'asturianu. Más info de les otres campañes:

vkm.is/echaaltrasgu

vkm.is/xogodasparellas

vkm.is/dominodeanimais

vkm.is/cualaye

¿A qué vamos dedicar la financiación?

Col 70% de la recaudación del Crowdfunding queremos financiar la edición y espublización del xuegu, el 22% de la financiación ye pa los gastos d'unvíu en Correos y el 8% que queda pa la comisión de Verkami pol usu la so plataforma.

¿Cómo y cuando ye la entrega?

Durante la campaña de Crowdfunding diremos dando los últimos retoques al diseñu del xuegu y tará llistu pa unviar a imprenta tres el fin de la mesma, cuando ya sepamos cuantes unidaes del xuegu vamos a pidir.

Si sal alantre la campaña, entamaremos dellos eventos d'entrega onde fadremos presentaciones tanto d'esti xuegu como del resto de conteníos que conformen l'universu que vien. Si nun pues venir a dalgún de los eventos d'entrega, podremos facelo llegar per Correos al tiempu que tendremos puntos de recoyida:

Xixón: Cuatro Gotes

Uviéu: Llibrería Trabe

Avilés: Olmar Regalos

Mieres: Decalupa

Noreña: La Semeya

La fecha d'entrega prevista ye pal mes d'abril de 2024