Hola, soi Susana Sela y prestaríame que diérais tira pa financiar esti proyeutu.
Soi una escritora asturiana qu'alcontróse nel camín con Luis Núñez, un músicu excelente que munchus conocéis de xuru polos grupos Sombrero de Copa o Fuera de Serie, allá palos 80-90.
Entamamos a trabayar xuntos y descubrimos una manera diferente de tresmitir los mios poemes. La música fáilos esnalar. Pero nun ye namái qu'una base con cuatru acordes mentantu que recito ensin más. Non. Son canciones, diferentes, pero canciones. Va vos prestar asgaya la experiencia, toi segura.
La mio poesía tien munches capes y encántame creyar atmósferes dixebraes y conseguir que'l públicu fáigales suyes y experimente les sos propies sensaciones. Poro, trabayamos con diferentes estilos: folk, pop, new jazz, rock.
Esto nun diba poder facelo ensin Luis. La so gran experiencia y téunica, xuníes a toles fontes de les que tien bebío, fai que too seya una experiencia perespecial.
Les recompenses
Establecimos dellos niveles, pa que podais escoyer el que más vos afaye. Pa ello, cuntamos cola collaboración de los illustradores, tantu del CD como del llibru, y d'una artista de la xoyería. Ufiertámosvos:
CD con un señalador de llibros que lleva unos versos de mio. Fechu a manu pa ti.
Llibru "La nueche de les llunes ausentes", en versión trillingüe asturianu/castellanu/inglés, que llevaráte a entamar un nuevu ciclu vital. Nelli apaecen los poemes que dieron aniciu al discu y dalguna sospresa más. Tamién tendrás señalador
Llámina doble de Félix Ordás, l'illustrador del CD
Perendengues fechos a manu de Ana Rodríguez Pastor
Colgante de plata de Ana Rodríguez Pastor
Taza con illustración de Miguel Ángel Díaz de la Campa
Conciertu priváu acústicu
Quiénes somos
Susana Sela: soi una escritora asturiana. Tengo editaos 3 llibros de poesía, ún d'ellso ganó'l Premiu Fernán Coronas nel 2004. Tamién edité un cuentu pa la reciella y tengo milenta hestories en preparación.
Luis Núñez: Músicu qu'entamó la so carrera col grupu Fuera de Serie nos años 80. Anguañu forma parte de Luis Núñez y los Folganzanes y comparte conmigo esti ambiciosu proyeutu. Delles de les sos canciones cunten con premios y ta perarguyosu d'ello.
En qué vamos gastar les perres
El dineru recaudáu va dir dafechu a financiar el proyeutu. Pa sacalo p'alantre, cuntamos cola collaboración de muncha xente y los gastos son ellevaos. A continuación, amuésovos los principales:
*Estudiu de grabación: 1200
*Mezcles y máster: 600
*100 copies del CD: 425
*Illustraciones y maquetación: 1200
*100 llibros: 500
El total asciende a 3925. Taría perbien algamalo, pero pedimos 2000€, pa recuperar parte de la inversión. Si superamos esti oxetivu y seguimos subiendo, trataremos d'ameyorar la calidá de los productos.
Calendariu estimáu pa la entrega
Espero nun me pillar los deos con esto. Calculo que podré entregalo too dafechu nun mes a partir del pieslle del crowfunding.
Caltendréivos informaos sobre la evolución del proyeutu, asina como de posibles imprevistos o retrasos
Tamién voi incluyir toa esta información nel Blog del proyeutu.
Sicasí, déixoivos equí un correu lletrónicu, por si en dalgún momentu tuviéreis que contautar conmigo:
Aú vais m'alcontrar
YouTube Podéis ver los 6 vidios que tenemos grabaos na mio canal de Youtube
Patreon Y si queréis collaborar en próximos proyeutos, podéis invitame a un café virtual en Patreon
¡Milenta gracies por too! Si arriendes d'ello, compartís la mio campaña cola vuesa xente, ye un gran sofitu pa mín.
Velequí ún d elos mios vidios:
3 comentarios
Si ya eres mecenas, Inicia sesión para comentar.
Nieves Bruxina
Enhorabuena a todo el equipo 👏👏👏
Susana Sela
Autor/a
Munches gracies, Marisa!! Por tar siempres ehí.
Marisa Luque
A tope. Norabona. Seguru que llegamos.