De Ninghures | Novo traballo 2022

Despois de case tres anos rodando por concertos e foliadas, ía sendo hora de sentarse a facer aquelo polo que tanto nos preguntastes: o noso PRIMEIRO DISCO DE ESTUDO está en camiño.

Neste traballo ensinamos o noso xeito de entender a música, o xeito no que moitas mozas e mozos a vivimos e desfrutamos hoxe. Temas que soaron nos nosos directos e outros que estreamos en primicia dan vida a este primeiro disco que se gravará no próximo mes de abril.

DE NINGHURES quen somos

Por orde de aparición dende a esquerda na foto superior somos… Eva, Cataqui, Marta, Adrián, Tomé, Aldara, Manu e Hadrián. Oito mozas galegas de moitos lugares, e ao mesmo tempo de ninghures, que desfrutan tocando xuntas as músicas de raíz.

Oito persoas rodeadas dunha grande variedade de instrumentos que formarán parte deste traballo: viola caipira, bongos, frauta traveseira, violín, bombo, ukelele, acordeón, pandeireta, clarinete, gaita, guitarras, pandeiro, voces, cabás... Isto débese ao noso gusto por mesturar e por investigar dende unha música que tenda pontes entre culturas.

Nestes anos de foliadas e concertos, a música tradicional enganchounos. Pero non só a nós, senón tamén a moita xente que nos foi escoitando. E si, tamén a esa xente que pensaba que o "tradi" non está vivo. De Ninghures estivo xirando dende 2018 en polavilas, festivais, mostras e tantos outros encontros cheos de amigas, bailes e música.

Agora é o momento de deixar constancia de todo aquilo do que nos impregnamos neste traxecto.

Din que a nosa xeración ten o peso enriba de varias crises e o certo é que ter nacido a finais dos 90’s está sendo todo un reto. Pero poder escoitar o froito de meses de traballo será, con seguridade, das mellores terapias.

Podemos facelo realidade xuntas se colaborades connosco neste proxecto :)

E os cartos a onde van?

As vosas aportacións servirán para financiar os gastos de gravación, produción, manufactura e distribución do disco.

Gravar un disco non é unha tarefa fácil. Non só teremos que pagar con infinitos euros a paciencia de Arturo Vaquero durante a gravación no estudo, senon tamén a mestura, masterización, fabricación dos CD e unha serie de obras ilustradas que darán mais significado e cor ao noso traballo.

Aquí podedes ver o reparto detallado das vosas aportacións:

Para as ilustracións que serán portada, deseño interior do disco e o resumo visual de certos singles que sacaremos (hehe) estamos colaborando coa arzuá Laura Mahía. Botádelle un ollo aos seus traballos nas redes sociais e entenderedes por que contactamos con ela. Artistaza!

Calendario previsto

A gravación levarase a cabo a finais do mes de abril, polo que contamos ter os CD e os demais materiais listos cara mediados de xuño. Son tempos aproximados marcados por factores que non dependen 100% de nós, pero contamos con esas datas.

MOITÍSIMAS GRAZAS POLO VOSO APOIO!!!!!!!

Vós tamén sodes De Ninghures e as forzas que precisamos para levar adiante este traballo.

GRAZAS GRAZAS GRAZAS

.

+ Info

Por aquí as nosas redes sociais para que nos coñezamos mellor e sigades o proxecto.

• Instagram para que nos vaiamos familiarizando

• Facebook para máis información sobre a recadación

• Youtube para que escoitedes os nosos traballos e concertos

• Para calquera dúbida ou cuestión non dubidedes en enviarnos un correo a [email protected]