❗️Para poder utilizar Verkami debes hacerlo desde otro navegador. Instala o entra desde: Microsoft Edge, Chrome o Firefox. Microsoft ha dejado de actualizar el navegador Internet Explorer que estás utilizando y ha dejado de ser compatible con la mayoría de sitios web.

Tiempu de Lleendes, primer videoxuegu orixinal n'asturianu.

Nesti RPG, el primeru n'asturianu, has ayudar a la xoven Xandria a percorrer el reinu de Ḥiria p'acabar col malváu rei del inframundu.

Xuegos Thandara

Un proyecto de

Categoría

Creado en

0
segundos
44
Aportaciones
1.750€
De 1.500€
Aporta al proyecto

Escoge tu recompensa

O apóyalo con una donación

Aporta sin recompensa
Haz una donación altruista al proyecto porque simplemente quieres ayudar a hacerlo realidad:

¡Hola! Somos Xuegos Thandara, un proyeutu que ñaz namás col oxetivu de desendolcar videoxuegos n'asturianu y sirvir de fonte d'inspiración p'afalar a otros a facer lo mesmo. Ye por ello que tamos poniendo toles ganes en sacar un primer trabayu bien curiosu, y polo que ye tan importante que la cosa tire p'alantre.

Tiempu de Lleendes, primer videoxuegu orixinal n
Tiempu de Lleendes, primer videoxuegu orixinal n'asturianu.

Yá de mano queríemos contavos que llevamos un tiempu desendolcando, per aciu de RPG Maker MV, el que va ser... ¡el primer videoxuegu de gran duramientu creáu n'asturianu! Una hestoria épica na que vas tener nes manes el destín d'un mundu enteru. Eso sí, esperamos que nun seya más que'l primeru de munchos. Pero pa eso... oi, que tendrá que salir primero esti, ¿acuéi? Y pa consiguilo necesitamos que nos eches una gabitu. Conque vamos contate un poco a ver qué te paez.

Menú d
Menú d'iniciu

¿DE QUÉ VA'L VIDEOXUEGU?

Nél acompañaríes a Xandria, una mocina (un poco desastre y acabante d'aprobar na escuela de maxa) que, masque nun lo sepa, va acabar convirtiéndose en lleenda. Con ella has percorrer el reinu de Ḥiria y formar un equipu d'héroes col envís de salvar el mundu del malváu Zargos, señor del inframundu.

Escueyi qué maxa elemental quies remanar y con qué collaciu viaxar primero d'abandonar Polazul, el pueblín del que Xandria ye oriunda, pa embarcate nuna aventura épica. Pues tomar decisiones qu'afeuten al destín de tolos que t'arrodien, conocer los distintos pueblos y races del reinu, facer mandaos pa xente estrambólico, cazar monstruos rarísimos y mercar o facer armes, armadures, pociones y artefautos máxicos de tou tipu.

Descubri por qué Xandria ye la única en mundu que pue impidir los planes de conquista del villanu y ayúdala a vencelu. Pa ello precisa la to ayuda, ¡fai'l favor, ho, nun la dexes esmangurriada!

Escueyi la maxa de fueu, aire, piedra o agua, asina como quién de los collacios va ayudate na aventura.
Escueyi la maxa de fueu, aire, piedra o agua, asina como quién de los collacios va ayudate na aventura.

El mundu de Ḥiria ye en parte basáu na mitoloxía asturiana, conque nél vas atopar trasgos lladruepos, diablos corninos, homones apavoriantes o los malvaos moros soterraños.

Pero tamién hai creatures d'otres tradiciones fechos a la nuesa, como los "babayinos" (los slimes tan comunes nos xuegos xaponeses) y otres dafechu nueves, como pue ser un crustáceu marín xigante al que llamemos "arañocla". Y espérente unes cuantes sorpreses coles que vas ablucar, pero pensamos que vas esfrutar más el xuegu si callamos delles coses.

Engarriada con unos babayinos de ríu.
Engarriada con unos babayinos de ríu.

Amás, nun ye solo nesto onde vas reconocer que'l xuegu ye fechu n'Asturies y dende Asturies. Vas atopar llagares, cultu a dioses asturceltes, llugares que van resultate bien familiares y abondu humor faltosu mui propiu d'equí. Siempre con procuru pa que'l xuegu seya pa tolos públicos, porque presta más que puea divertise xente de toles edaes. ¿Nun ye una manera estupenda de que los pequeños depriendan asturianu?

En llagar pues avisar a un paisanu de que, si nun se pon yá a trabayar, la muyer va echa-y una sorpresina en pote.
En llagar pues avisar a un paisanu de que, si nun se pon yá a trabayar, la muyer va echa-y una sorpresina en pote.

Tamién vas tener la opción, porque tamos ciertos de que va haber unos cuantos filólogos y friquillingüistes ente los interesaos en xuegu, de deprender a falar gochinés, la llingua d'una raza d'homes-gochu creada n'esclusiva pal xuegu, cola que vas ser a comunicate con ellos. Pero vamos, que nun t'esmolezas si se te dan mal los idiomes, nun fai falta deprender esta llingua p'acabar el xuegu.

Na Universidá de Resplandiu ta abiertu
Na Universidá de Resplandiu ta abiertu'l plazu pa los cursos de gochinés.

Y como queremos que nun dexes el xuegu pehí zampáu dempués de pasalu una sola vegada, creemos una montonera d'opciones coles que vas empobinar la hestoria pa delles finales distintes, porque la escena de lo que pasa n'acabando col monstruu postreru va camudar según lo que ficieres enantes. ¡Les decisiones que tomes y a quien ayudes a lo llargo'l xuegu pue cambiar el destín de tol reinu! Asina, cuando acabes la partida pues volver a empezar, y ver qué asocedería de nun facer lo que decidisti.

Tamién escondimos detallinos a esgaya per tol mapa, pa tar ciertos de que siempre alcuentres dalgo de lo que la primera vuelta nun te decatares.

RECOMPENSES ESCLUSIVES PA MECENES

Como'l xuegu ye bien basáu nos de los años noventa, sobre manera nos de rol xaponés y nes aventures gráfiques, queremos facer pal xuegu una guía del xugador al estilu de les que se vendíen d'aquella, y onde, amás de date nicios y conseyos que t'ayuden coles cosadielles coles que vas rucate, vamos esplayanos no que ye'l mundu de Ḥiria y falar de requexos que se menten mui pencima en xuegu.

A partir de la recompensa "Aprendiz/a de maxa" vamos entregate esti manual y un cartelu bien grande y guapu cola portada pa que pongas na paré... bono, o onde te pete, que pa dalgo ye tuyu.

Arriendes d'esto, a partir d'esta recompensa tamién vas salir nos creitos finales, lo que va inmortalizate como una de les persones gracies a les que se fizo'l primer videoxuegu n'asturianu.

LA POSIBILIDÁ DE SALIR EN XUEGU

Por embargu, si tolo que te contamos nun ye enforma pa ti... ¡Pues salir nel mesmu xuegu como un personaxe qu'atopar! Dibuxámoste a partir d'una semeya y ponemos al personaxe'l to nome. ¿Imaxines?

Blanca Fernández y Andrés Fernández presentáronse voluntarios pa mostravos como queden los sos avatares. ¿Nun vos prestaría tresformavos? A estes, si buscáis bien vais poder atopar a estos dos en xuegu...
Blanca Fernández y Andrés Fernández presentáronse voluntarios pa mostravos como queden los sos avatares. ¿Nun vos prestaría tresformavos? A estes, si buscáis bien vais poder atopar a estos dos en xuegu...

Cola recompensa Lleenda yes un estra qu'anda pehí pasiando y col que se pue falar (decides la llinia de diálogu, pero apta pa tolos públicos, ensin faltar a naide y ensin conteníu políticu). Cola recompensa Cuélebre yes un personaxe que manda a los xugadores facer una misión secundaria... ¿Qué t'apetez? Pues mandar atropar los ingredientes pa facer una tarta, o quiciabes acabar con un monstruu qu'anda pehí asustando a la xente... Y esto ye namás por poner dos exemplos. Eso sí, más te val entainar, porque estes recompenses tienen poques places y son solo pa los primeros que lleguen.

CALENDARIU PREVISTU

Yá tenemos desendolcada gran parte del xuegu, pero necesitamos la to ayuda pa da-y un últimu emburrión. Si nos ayudes y el proyeutu sal p'alantre facémoste entrega de toles recompenses pa payares, mientres que'l xuegu nun va tar a la venta pa los non-mecenes hasta les navidaes (dalgo más caru y ensin los estres que t'ufrimos).

DEMO Y OTRES COSUQUES

Yá tenemos una demo que pues probar descargando esta carpetina y calcando dos vegaes en Demo.exe.
Pa Windows
Pa Linux

Yá va tiempu que tenemos una demo pa descargar, por si tovía duldes sobre lo que te va prestar el videoxuegu.
Yá va tiempu que tenemos una demo pa descargar, por si tovía duldes sobre lo que te va prestar el videoxuegu.

Amás, a lo llargo de la campaña vamos xubir dellos videos nos que te contamos otros detallinos del videoxuegu. Yá pues ver ún nel que nos esplayamos un poco más y contámoste l'argumentu.

Tiéneslu calcando equí: Anunciu estendíu

Y más nada, qu'esperamos que lo pases estupendo... Bono, y si'l xuegu tien bien d'ésitu, yá vos dicimos que tenemos delles idees pa una segunda parte.
¡Un saludu!

CONTAUTU

Si quies ponete en contautu con nós pues facelo per aciu d'estes plataformes:
Corréu electrónicu
Páxina de Facebook
Cuenta de Twitter

Preguntas frecuentes

Aún no hay ninguna publicada.

¿Tienes alguna otra duda o pregunta?

Pregunta al autor/a

2 comentarios

Si ya eres mecenas, Inicia sesión para comentar.

  • Ediciones Radagast

    Ediciones Radagast

    casi 2 años

    Prestosísimu proyeutu! En Radagast sofitamos y naguamos por tenelu yá enteru :)

  • Francisco Gutierrez Fernandez (Pachi)

    Francisco Gutierrez Fernandez (Pachi)

    casi 2 años

    ¡Préstame enforma participar d'esti proyeutu! Norabona 😁

0 comentarios

Inicia sesión o Regístrate para comentar esta entrada.

#08 / ¡Yá nun queda nada!

¡Saludos, salvadores de Ḥiria!

Queríemos comentavos que, magar los atrasos producíos pol ataque de Zargos al programador, la cosa agora va estupenda y yá entramos na fase final del proyeutu: cuando unos pocos d'escoyíos prueben la versión beta del xuegu. Esto ye un privilexu, pero tamién una responsabilidá, porque van descubrir esos fallinos que podríen estropiavos la esperiencia de xuegu.

Llueu, mui llueu, salvar el mundu va tar nes vueses manes...

#07 / ¡Volvemos al tayu!

¡Hola, collacios y collacies na llucha contra'l mal!

Allégranos dicivos que tres de los pequeños "problemes téunicos" volvemos a trabayar nel xuegu, y la verdá que yá nos queda una migayina de nada p'acabalu. Esperamos siguir cumpliendo los plazos, pero vamos tener de dir mui a poco y a poco porque la recuperación médica va un pelín lenta.

De toles maneres vamos tenevos al día de los avances, y avisavos cuando empecemos el testéu final.

Munches gracies a toos y toes, porque nun podríemos vencer al malváu Zargos ensin vós.

#05 / ¡Nun queda nada!

De nueves, munches gracies a tolos que facéis posible esti xuegu... ¿Cómo ye, ho? ¿Que tovía nun participasti? ¡Vas perdete les recompenses esclusives, nun queda nada p'acabar la campaña! :P

#04 / Cuarenta tiempulleenderos

De nueves queríemos davos les gracies a toos, pos yá sobrepasamos l'oxetivu con nada menos que cuarenta mecenes. El xuegu va facese realidá y ye gracies a vós. Eso sí, queda namás una selmanina y la metá de los siguidores tovía andáis un poco remolonos... ¡Recordái que tendríeis accesu a recompenses esclusives, y al xuegu primero que los demás!

Vémonos pronto. ;)

#03 / ¡OXETIVU CONSIGUÍU!

¡OXETIVU CONSIGUÍU!

Vamos tener un videoxuegu orixinal n'asturianu y ye gracies a vós, que lo ficistis posible.

Munchísimes gracies a toos.
¡¡¡Tiempu de Lleendes, pronto nes vueses cases!!!

Y los que tovía nun sofitastis la campaña, tais en tiempu de facelo. ;)

#02 / ¡Tamos a una migayina!

Venga, xente, tamos a una migayina de nada de consiguir l'oxetivu y facer realidá'l primer videoxuegu orixinal n'asturianu...

Los que tovía nun sofitastis el xuegu, entainái... ¡porque queden pocos díes y ye agora o nunca!

Si tovía nun vos decidistis, recordái que tenemos una canal de YouTube onde esplicamos dellos aspeutos del xuegu, y que nos perfiles de Facebook y Twitter xubimos información sobre personaxes y monstruetos.

¡Nun dexéis que Zargos se faga col reinu de Ḥiria!

#01 / ¡Siguimos adelantre!

Ayeri salimos na tele y yá tamos bien cerca d'algamar l'oxetivu... ¡¿Cómo ye, ho?! ¿Que nun nos visti? ¡Tiénesnos equí!

Bono, a lo que díbemos, que col vuesu sofitu yá tamos pa consiguir l'oxetivu, nun nos queda cuasi nada pa poder facer de Tiempu de Lleendes una realidá. ¡Gracies!

Por si lo olvidáis, recordavos que vamos xubiendo dellos vídeos a la canal de YouTube pa mostravos coses del xuegu, y a Facebook y Twitter tamién xubimos unes fichines de monstruos y personaxes va que vos vaigáis faciendo al mundu de Ḥiria.

Siguimos falando, a ver si xuntos somos a dar una cuelma al Zargos esti, que menudu pieza ta fechu. ¡Un saludu!

Utilizamos cookies propias esenciales para poder ofrecer nuestro servicio y de terceros para poder conocer el uso de la página. Política de cookies