Llugares máxicos d'Asturies - Lugares mágicos de Asturias

De qué trata'l llibru

Llugares máxicos d'Asturies - Lugares mágicos de Asturias ye un llibru que fala de la mitoloxía de los vieyos astures y de llugares onde la maxa del so pasáu inda sobrevive nel presente con una fuercia imposible de disimular.

Al traviés de les sos páxines, van asocediéndose llugares arreyaos a estrañes y ancestrales lleendes que s'enguedeyen cola presencia de vieyos menhires, dólmenes solitarios, castros escaecíos o ablucantes construcciones de seres escomanaos. Pero tamién de llugares con misteriosos símbolos d'abegosa interpretación grabaos en disimulaes piedres, asina como otros con rudimentarios dibuxos al abeyu de remotes cueves o horros centenarios.

Llugares máxicos d'Asturies - Lugares mágicos de Asturias ye un llibru que tamién fala del territoriu onde vivieron los astures. D'aquellos llugares onde la naturaleza enxendró diseños que nos fascinen pola so infatigable imaxinación. Ente ellos hai playes ensin horizonte, furacos xigantes que furen los montes más altos, viesques inesploraes o buelgues de dinosaurios amosando'l cursu decidíu hacia un destín desconocíu. Y too ello, ensin escaecer que son llugares habitaos por seres tan estraños como cuélebres, xanes, pataricos, nuberos... o una pléyade de poderosos dioses celtes.

Cómo ye'l llibru

El llibru ta formáu por sesenta llugares del territoriu astur axuntaos en siete capítulos. Cada llugar va acompañáu de polo menos dos semeyes en gran formatu y un testu descriptivu n'asturianu y castellanu.

Por ser en gran formatu, les semeyes aína atrapen la vista del llector p'allugalu nel llugar. Sicasí, el testu va reclamar nel intre'l so protagonismu y cola so llectura la maxa del llugar va desplegase en tol so universu. El llector va ser merguyáu nes lleendes más ancestrales, los acontecimientos más misteriosos y les fábules más estraordinaries. Al finalizar el testu, la vista va tornar a posase sobre la imaxe, pero esta vegada suxestionada y dubitativa, cuestionando lo qu'enantes nun yera quien a pescudar.

Les carauterístiques

• Tamañu en gran formatu 300 x 230 cm apaisáu
• 148 páxines aprox.
• Papel 150 g con barniz de proteición
• Testu blancu sobre fondu negru
• Tapa dura
• Testos billingües, asturianu y castellanu

Les recompenses

N'agradecimientu a l'aportación de los mecenes, quixe ufrir tres recompenses según la opción esbillada:

• Mención nel llibru como mecenes
• Adquisición d'una taza o tapetín de mur esclusivos personalizaos. Nellos va amosase la portada del llibru amás de la frase "Yo fui mecenes" y el nome de la persona que se desee

L'autor

Magar que soi biólogu, camiento firmemente que namás vamos poder preservar la bayura d'esti planeta si lo facemos na totalidá de la so diversidá biolóxica y cultural. Considero que debemos valorar tanto la herencia creada pola naturaleza como la creada pola nuesa especie. Esti ye l'elementu que m'afaló a escribir el presente llibru.

Nel trabayu recueyo varios llugares d'esta parte del planeta que conocemos como Asturies que, por un motivu o otru, son estraordinarios. Pretendo que'l so conocimientu ayude a la so conservación y preservación pa les futures xeneraciones.

Dellos de los mios trabayos de divulgación atópense n'Editorial Trabe, lne.es, asturies.com, asturnews.com, asociación Vindonnus, sabencia.net o lavozdeasturias.es.

Destín de les aportaciones

Les aportaciones recibíes van dedicase a sufragar los costes d'edición del llibru. Ente ellos tán el diseñu, composición y maquetación. Finalmente, la impresión, gastos de campaña y unvíu de les vueses recompenses.

Ah, y pa cumplir colos impuestos!

Entrega de los llibros

El llibru ta práuticamente termináu, quedando namás unes pequeñes pincelaes. Por ello, espero comenzar les entregues a finales de xineru o entamos de febreru.

+ INFO

Agrégame en facebook: Bertu Ordiales.

Aína entamamos un concursu pa vosotros!!