Matrioshka aposta pola túa iniciativa para escoller qué espectáculos chegan ata ti.
En Matrioshka estamos máis ca orgullosas de "C’est la Vie", espectáculo co que estreamos a compañía e gañador dun premio María Casares na edición de 2014.
Mais tentando distribuílo atopámonos continuamente con que as institucións que xestionan teatros e auditorios públicos non dispoñen de recursos abondo para programar todo o que che gustaría ver. “Encántame o espectáculo e quero programarvos pero non teño orzamento”, dinnos con frecuencia.
Isto supón que moita da xente que quere ver o noso traballo non ten opción a facelo.
Pero as matrioshkas somos mulleres decididas e teimudas; estamos empeñadas en que quen queira ver "C'est la Vie" poida facelo así que nos lanzamos á piscina e asumimos o risco de facer funcións confiando directamente no interese real do público por ver o noso traballo.
Con esta campaña queremos estreitar o vencello de Matrioshka contigo.
Con espectáculos que están programados de antemán, os espectadores poden optar ata que se pecha a billeteira do teatro por ir ou non e a función faise igual. Neste caso, como posible mecenas, debes ser consciente de que "C’est la vie" estará nestes tres espazos escollidos só se ti te comprometes e apoias a campaña.
Podes ter a seguridade de que o espectáculo non te defraudará e, ademais, sairás da experiencia cunha recompensa pensada especialmente para ti, coidada e xeitosa.
A Minixira "C'est la Vie"
16 de abril, Santiago de Compostela, Teatro Principal
18 de abril, Vigo, Auditorio Municipal
30 de abril, Boiro, Casa da Cultura
Cada mecenas ten a opción de ver C'est la vie en calquera destes tres espazos, unha vez rematada a campaña preguntarémosche ónde queres vernos e terás garantizada a entrada ata completar o aforo da sala.
As aportacións dxs mecenas estarán dirixidas a cubrir os gastos das tres funcións da xira: salarios segundo convenio, cotizacións, dietas, desprazamentos e materiais funxibles.
Podes Acceder a todos os detalles sobre Matrioshka e C'est la Vie en:
matrioshkateatro.wix.com/matrioshka
E se tes dúbidas ou preguntas sobre o proxecto, por favor, pregúntanos. Encantaranos estar en contacto contigo.
Estamos desexando chegar ata ti con C'est la Vie, queremos verte e que nos vexas
Mil grazas
0 comentaris
Si ja ets mecenes, Inicia sessió per comentar.