Estudios Tex. O mundo dos debuxos animados.

OS ESTUDIOS TEX. O MUNDO DOS DEBUXOS ANIMADOS

Xarope de lambetadas, bolas de sésamo, un anaco da capa de Superman, un guecho de pelo de Pitufiña e o máis importante: cerebro de neno ou de nena.

Estes son os ingredientes que compoñen a fórmula secreta da imaxinación. Unha beberaxe fundamental para poder facer as mellores películas de debuxos.

Un premio nunha bolsa de patacas somerxe a Nuno e Marabilla nunha trepidante e misteriosa viaxe polo descoñecido universo dos debuxos animados. Os dous protagonistas coñecerán personaxes extraordinarios como o monstruoso Golo, a supernena troglodita Lume, o invisible Radón ou o malvado Escornabois.

Nuno ten oito anos e pasa as tardes vendo películas de debuxos na tele. Ten o cuarto cheo de bonecos e as paredes ateigadas de pósters dos seus personaxes preferidos. Encántalle xogar a facer de superheroe. Moitas veces disfrázase de Batman e viste de Robin o seu can. É a súa mascota. Un sabuxo cheirón. Chámase Marabilla. Acompáñao a todos os sitios. A Marabilla tamén lle gusta ver a tele, pero goza máis rillando nun óso de diplodoco xigante que lle regalaron no museo de historia natural da vila.

A historia consta de oito capítulos. Entre cada un haberá unha páxina de descanso, chamada Intermedio. Cada unha destas páxinas levará un xogo diferente, relacionado coa animación e cos personaxes dos Estudios Tex.

As presentacións do libro polas diferentes bibliotecas e librarías de Galicia, convertiránse nun obradoiro de animación, onde @s cativ@s aprenderán a facer unha pequena película de debuxos.

Os Estudios Tex terán unha páxina web na que se colgarán todas as animacións feitas pol@s diferentes nen@s. Ademáis tamén haberá información dos personaxes, descargas...

CARACTERÍSTICAS DO LIBRO

O libro constará de 64 páxinas a toda cor, onde o texto se misturará con ilustracións e viñetas de cómic. Papel ofset de 130gr.

Portada rústica 250gr 4/0 tintas. Plastificado mate.

As medidas:

14,8 de ancho X 20,8 de alto.

SOBRE O AUTOR

Nacín en Vigo en 1981 e o meu traballo é debuxar e contar historias.

Levo dez anos traballando neste mundo e por primeira vez vou probar a experiencia da autoedición.

Entre outras cousas, publiquei a serie xuvenil Xoeliki as aventuras dun ciberpirata premiado na IX edición do premio literario Frei Martín Sarmiento na categoría de 12 anos (feita xunto con Maties Segura); a colección Contos que len outros nenos do mundo; A fortuna de Bartolomeu; Xanardán e a becha ; Grandes contra pequenos; e a historia de cómic Juppy que Vicio seleccionada no salón de Historias em Quadrinhos de Sao Paulo.

O conto infantil As espiñas do porco espiño, da colección Contos que len outros nenos do mundo, foi premiado pol@s nen@s na VIII edición do Premio Literario Frei Martín Sarmiento na categoría infantil.

O meu blogue:
Abraham Carreiro

A QUE SERÁN DESTINADAS AS VOSAS APORTACIÓNS

As aportacións que fagades, destinaranse exclusivamente á edición e promoción do libro.

CALENDARIO

O proxecto está bastante avanzado. A primeiros de outubro o libro estará impreso e listo para a distribución. Polo que entre o 15 e o 30 de outubro do 2013 recibiredes as vosas recompensas.