Heliotropo - Cine de ciencia-ficción en galego

O noso proxecto

Heliotropo é unha curtametraxe de ciencia-ficción rodada en galego e en Galicia por actores novos e cienastas locais.

Nela, preséntase un futuro distópico no que uns extraterrestres invaden o planeta e comenzan a terraformalo para facelo habitábel para eles mesmos. A humanidade, tras intentar enfrontalos e fracasar nun primeiro momento, comeza a descender nunha espiral de desesperación e decadencia. Esther, unha rapaza que perde á súa nai na invasión, vai apañando para sobrevivir, pero non pode evitar descender ela mesma tamén aos infernos da corrupción moral aínda tendo nas súas mans o artiluxio que podería salvar o planeta. Ante esta nova esperanza, aparece o Redentor Vermello, unha figura ambigua e controvertida, que intentará liderar ao que queda da humanidade cara a salvación.

A ciencia-ficción é un fío condutor que permite presentar temas moi diversos dende unha perspectiva orixinal. Así, nesta curta, propóñense dúas lecturas a diferentes graos de profundidade: aínda que na superfice atopemos extraterrestes e acción bélica, no fondo formúlanse cuestións filosóficas e morais que nos fan reflexionar e preguntarnos que faríamos nós chegada unha situación similar. Deste xeito, non só intentamos que o espectador goce visualmente da curta, senón tamén conmovelo. É por isto que é un dos nosos xéneros favoritos: a flexibilidade que che da, permíteche deixar voar a túa imaxinación, pero ao mesmo tempo, sempre reposa sobre temas reais, o cal nos mantén cun pé no chan.

A cantidade de traballo que hai detrás dun proxecto cinematográfico é inmensa: uns poucos minutos na pantalla implican meses de traballo. En particular, neste caso, tras realizar formación en diversos aspectos da produción audiovisual, estamos poñendo todo o noso saber facer, o noso tempo e sobre todo, o noso agarimo, en "Heliotropo": en primeiro lugar, escribir o guion. A continación, a preprodución, coa busca dos actores, localizacións, preparación do vestiario, props e outros obxectos, e preparación de todo o material cinematográfico.

Só entón lévase a cabo a produción e, en particular, a rodaxe:

E finalmente, o que neste caso levará máis tempo, a posprodución, proceso no cal estamos inmersos actualmente. É aquí onde realizaremos a revisión do material rodado e a montaxe, a cal inclúe, entre outras cousas, os efectos visuais, un elemento moi importante nun proxecto de ciencia-ficción, así como a banda sonora, a cargo de Aaron Castiñeira.

Por que axudarnos

Como podedes entender, todo o traballo mencionado anteriormente involucra a moitas persoas, pero desafortunadamente, na actualidade, o sector audiovisual é bastante precario, sobre todo para os que estamos comezando, e que os proxectos saian adiante adoita depender, en gran medida, das boas intencións e a ilusión da xente. Polo tanto, con esta campaña, preténdese axudar a tódolos participantes desta curtametraxe a dar os seus primeiros pasos na súa profesión con certa dignidade.

Ademáis do apoio económico para retribuir a tódolos participantes así como axudar a recuperar parte da inversión xa realizada, hai moitos outros gastos que aínda están por vir, que están asociados sobre todo a posprodución e, en particular, aos efectos visuais.

Finalmente, con este proxecto apóstase tamén polo talento local, xa que non só está rodado en galego, senón que é 100% producido en Galicia e, dende a nosa pequena produtora Lámbrica Producciones, pretendemos continuar nesta liña en proxectos futuros.

Se concretamos un pouco máis, velaquí embaixo o listado dos principais gastos que xa tivemos e os que prevemos ter antes de finalizar o proxecto:

• Preprodución: equipo cinematográfico; vestiario, props e outras ferramentas.

• Produción: loxística e desprazamentos; honorarios actores e equipo técnico.

• Posprodución: honorarios do compositor da banda sonora; licencias de software de efectos visuais; compra de tempo en granxas de renderizado; compra de modelos 3D, librerías de son e vídeos de stock.

• Distribución: inscrición en festivais.

Calendario

Como comentamos, a preprodución e a produción xa están rematadas.

Agora estamos en plena posproducción, a fase máis longa, xa que inclúe montaxe, efectos visuais, corrección de cor, son, banda sonora, etc.

A nosa intención é rematar a curtametraxe en torno a marzo de 2023 e comenzar entón coa entrega das recompensas.

Quen somos

Pero, quen está realmente detrás de todo isto?

Lámbrica producciones é unha pequenísima, diminuta e incipiente produtora audiovisual viguesa. Tras este nome atópanse Rubén Suárez, director e produtor, así como Alicia Pérez, distribuidora e community manager.

A nosa toma de contacto inicial co sector cinematográfico foi con Abismo, a nosa primeira curta, que realizamos cun reducido equipo de sete persoas, includos tódolos actores e persoal de produción.

Agora, con Heliotropo, lanzámonos a un proxecto moito máis ambicioso no que colaboran moitas máis persoas. A complexidade do proxeto medrou rapidamente, de xeito que decidimos apostar por primeira vez por levar a cabo un crowdfunding, co obxectivo de podermos implementar todo o que temos en mente.

En Heliotropo contamos cun elenco e un equipo técnico marabilloso:

María Francelina: produtora, directora de actores e actrices. Veterana do sector, danos sempre mil consellos e recursos que tentamos aproveitar ao máximo.

Sergio Alfonso: ademáis de grande actor, axúdanos sempre no que sexa preciso (produción, son, organización, etc).

André Costal: director de arte da curta. Tamén fixo de figurante e, en xeral, botounos unha man co que foi preciso.

Ademáis deles tres, no elenco contamos cos actores e actrices galegos Sergio Macías, Ara García, Raquel Meleiro, David Carbó...

Agás Sergio Macías, veterano do cinema e a televisión nacionais, e María Francelina, o resto do elenco son actores e actrices novos, a meirande parte estudantes ou graduados da Escola Superior de Arte Dramática de Galicia, ou membros de grupos de teatro de Vigo.

Máis información

Se queredes coñecernos un pouco mellor e botarlle un ollo ao noso traballo, velaquí tedes algunhas ligazóns intersantes:

A nosa web oficial: https://lambrica.com/

Aquí podedes visualizar o tráiler de Heliotropo que temos xa preparado: Tráiler Heliotropo

A rede social na que máis nos movemos agora mesmo é en Instagram, onde imos subindo fotos e vídeos do noso traballo, tanto do proceso coma do resultado: Instagram

Aaron Castiñeira é o compositor que vai realizar a banda sonora da nosa curta, botádelle un ollo á súa web oficial: Aaron Castiñeira.

Na seguinte ligazón pódese visualizar o tráiler de Abismo, a primeira curtametraxe que realizamos:
Tráiler Abismo

E finalmente, por se vos interesa, deixámosvos aquí embaixo algunhas imaxes máis de todo o que xa temos feito de Heliotropo: