Esanezinen lehen EPa.

Plazer eta ilusio handiz Esanezinen lehen EPa izango dena aurkeztu nahi dizuegu, 2019ko udaz geroztik honaino sortutako abestiek osatuko duten bilduma alegia. 2020ko apirilean kaleratu genituen “Esan Ezin” eta “Altzagarate”-ri beste 4 kantu gehituz 6 abesti izango ditu guztira diskoak.

Esan ezin diren gauzek ekarri gaituzte honaino, denborak ez dituelako hauek esango, baina bai musikak. Orain arte esatera ausartu ez garenak abestu nahi ditugulako, orain arte ausartu ez diren guztiekin, zurekin ere.

Esan ezin direnak esanezin direnekin abesteko.

Nor gara?

Ianire Aranzabek Oriol Floresen laguntzaz sortutako proiektu musikala da Esanezin.

Ianireren lehen pausoak dira musikari dagokionez, umetatik musikari lotuta egon bada ere. Hitzak horma eta doinuak teilatu, abestiz eraikitako etxea du gordeleku. Musika du arnas, batzuetan bizitzeko eta bestetan bizitzaz ahazteko.

Oriol esperientzia handiko musikaria da, zehatzago esanda, baterijolea. Izaro, Idoia Asurmendi, Betacam, Olimpia edo Pol 3.14 bezalako artistekin aritu da.

Proiektu honen atzean ikusten ez den lan asko dago, eta ikusten ez diren pertsona asko, baina haiek gabe ezinezkoa litzateke hau dena.

Grabaketetan Claudi Arimany (El Turonet) eta Eñaut Gaztañaga (Gaztain Estudioak); eta masterizazioan Aberin estudioa.

Garazi Esnaola (pianoak), Guillem Callejon (gitarra eta baxuak) eta Leire Berasaluze (ahotsa "Esan Ezin" abestian").

"Esan Ezin" eta "Altzagarate" abestien bideoetan Mattin Zeberio, hitzak irudi bihurtzen.

EPa eta poltsaren diseinuan Maddi Pecharroman eta Saioa Arregi, eta poltsaren estanpazioan Aldai serigrafia.

Eta nola ez, familia eta lagunak, beti gertu, etxe hau zutik mantentzen.

Sariei buruz

Zuei esker grabatuko ditugu kantu hauek, horregatik egindako ekarpenaren arabera sari ezberdinak egongo dira: EParen deskarga digitala, EPa formatu fisikoan edota telazko poltsak.

Horrez gain, musika zuzenean egitea maite dugunez sari bereziagoak ere egongo dira, zure etxean kontzertu akustiko bat emateko aukerarekin.

Zertara bideratuko ditugu zuen ekarpenak?

Zuen ekarpenak EP hau sortzeak dakartzan gastuetara bideratuko ditugu:

• Estudioa, bertan grabaketak eta nahasketak egingo ditugu.

• Abestien masterizaziorako.

• Zuen etxeetara iritsiko diren EPak formatu fisikoan aurkeztu ahal izateko eta honen diseinua zein bidalketak egin ahal izateko.

• Taldearen merchandisingarekin lotutako produktuak egiteko.

Aurreikusitako egutegia

Azaroan sartuko gara estudiora, falta zaizkigun 4 abestiak grabatzera. Behin abestiak grabatuta, nahasketak eta masterizaziorako denbora izango da.

Aurreikusten dugu otsailerako diskoa amaituta izatea eta hilabete horretan zehar sariak zuen etxeetara bidaltzea, eta gure doinuak zuen belarrietan egotea.

Eskerrik asko, hau zuri esker da❤️

+ Info

Taldearen inguruko informazio gehiagorako edota zalantzaren bat izanez gero hemen jarrai gaitzakezu:

Instagram

Spotify

Twitter

Facebook

Youtube