Galician Bizarre 3

O Galician Bizarre naceu hai unha década como un movemento que agrupaba bandas da escena underground galega, marcado pols influencias musicais anglosaxonas pasadas polo filtro do país: que che guste como sonan os Cramps, Sonic Youth, Aphex Twin ou os Beastie Boys non impide falar de Manuel Fraga, o Apóstolo Santiago, Luar ou o que che pete.

Nestes anos o Bizarre floreceu e murchou varias veces, deixando polo camiño numerosos concertos, deseños gráficos memorables, bandas populares e esquecidas, grandes churrascadas e dous volumes recopilatorios co mellor de cada casa:

Os volumes 1 e 2 ían dende o punk irreverente de Novedades Carminha e Terbutalina ao pop electrónico de Carrero Bianco, do noise de Telephones Rouges ao garaxe de Fantasmage ou do surrealismo de Alarido Mongólico ao rock and roll de Los Santos.

Seis anos despois do segundo volume, rexurdimos das nosas cinzas para retratar a escena galega do momento, igualmente rica e caótica: unimos dezasete bandas e artistas e hai pop lo-fi, trap, neopsicodelia, post-grunge, punk, electrónica e o que se che ocorra, con cancións inéditas en case todos os casos.

O tracklist do Galician Bizarre 3 é este:

CARA A
Pantis - Mar
Contenedor de Mierda - Síndrome de Dawson
Esposa - Nós contra nós
Dois - Dominguero
Lamprea Explosiva - Polok
Selvática - El fondo del mar
Atrás Tigre - Abisal
Boyanka Kostova - Konaseinochan
Pálida - You Were Melting in the Wrong Hands

CARA B
Travesti Afgano - Catro anos máis
Bifannah - Ervas
Puma Pumku - Velvet Dream
Oh! Ayatollah - Pablo Callejo
Estrambote - Viajes en el tiempo
Jay - Ser humano
Bulto - Todos los días es mi cumpleaños
Kadett GSI - Motor

O deseño do álbum corre a cargo do artista e músico vigués Óscar Raña, continuando así o vínculo do Galician Bizarre co vibrante mundo do deseño e a ilustración en Galicia: Rubén Prol, Andrés Magán, Mar Catarina e Rubén Domínguez asinaron as portadas e contras dos volumes anteriores.

Da masterización ocuparase Ibán Pérez no Terraforma Studio do Hío (Cangas), de onde teñen saído un bo número dos discos máis relevantes dos últimos anos en Galicia.

Sobre as recompensas

Ofrecémosvos diferentes opcións para participar da edición do Galician Bizarre 3: ademais de mercar o disco anticipadamente, tamén tedes a opción de levarvos unha das camisetas exclusivas con deseño de Rubén Prol, sempre escollendo entre a recollida en tenda e recibilo na casa.

A maiores, podedes plasmar o voso apoio ás bandas bizarras facendo que o voso nome apareza nos créditos do disco, ou colaborar como asociación ou selo e incluír o voso logo na folla interior.

E tamén un par de opcións máis tolas. Mirade debaixo!

Sobre nós

O Galician Bizarre é un movemento autoxestionado e colaborativo do que participan as propias bandas e outras persoas que aportan o seu traballo voluntario.

Ademais da edición dos recopilatorios e de organizar numerosas festas e concertos, vimos de lanzar un blog no que recoller a actividade presente e pasada da escena, con entrevistas, opinións e textos críticos.

A que destinaremos as vosas achegas

As vosas aportacións servirán para financiar o total dos gastos da edición, que son os seguintes:

A: 500 LPs en vinilo negro con galleta, funda interior, carpetas exteriores, transporte e test pressing: 1700 €

B: Follas interiores con créditos e letras: 120 €

C: Deseño da portada: 200 €

D: Deseño do logo: 150 €

E: Masterización: 363 €

F: Gastos Verkami: 150 €

G: Gastos pago con tarxeta: 20 €

H: Gastos PayPal: 100 €

I: Compra e estampado de 50 camisetas Galician Bizarre: 363 €

J: Gastos de envío: 300 €

K: Impostos: 250 €

TOTAL: 3716 €

Calendario previsto

O proceso de fabricación dos discos dará comezo co lanzamento desta campaña de crowdfunding. Unha vez rematados os 40 días nos que se poden recibir aportacións, realizaremos e imprimiremos as follas interiores, coa intención de que unha vez recibidos os LPs poidamos comezar a distribución dos discos e as recompensas. A nosa previsión é que recibades o que adquiristes cara o final de xaneiro!

+ Info

Se tedes calquera dúbida ou queredes saber máis sobre o Galician Bizarre, podedes seguirnos en Facebook ou Instagram.

Tamén podes poñerte en contacto connosco pinchando debaixo destas liñas en "Pregunta ao autor" ou deixando un comentario.