Únete á rebelión da lectura

O proxecto

Espazo Lectura é unha asociación sen ánimo de lucro que fomenta a lectura en lingua galega. Mediante voluntariado, desenvolve ao longo do ano actividades para todas as idades: dende bebés a adultos (Noite na Biblioteca, Contomar, Lendo Contigo, Contos en Cueiros, Lecturas Debuxadas...).

No ano 2026 vanse cumprir 20 anos do Contomar, a primeira actividade de Espazo Lectura, e para celebralo estamos preparando unha longametraxe documental sobre a historia da asociación, que recolla todos estes anos de traballo e ilusión: A rebelión da lectura.

Cronoloxía

O documental vai mesturar material de arquivo con entrevistas, que se van rodar a finais do verán do ano 2024. Durante o 2025 levarase a cabo o proceso de posprodución, e A rebelión da lectura fará a súa estrea a principios do 2026, coincidindo co aniversario.

As recompensas deste crowdfunding entregaranse en man en diferentes cidades de Galicia (Gondomar, Vigo, Ourense e Santiago de Compostela). Para facer estas entregas, poñerémonos en contacto con vós para seleccionar data e cidade, e en caso de que estas localizacións sexan imposibles, buscar a mellor solución para entregalas.

Equipo técnico

O equipo técnico da longametraxe está formado tanto por persoas que medraron con Espazo Lectura, como por outras que se foron unindo á familia máis adiante. Todas elas teñen formación e experiencia previa nos ámbitos da cultura ou do audiovisual, participando noutras obras anteriores que percorreron festivais estatais e internacionais. Entre esas obras podemos atopar moitos moito ou Señora, por favor (prod. Prime Video, CIMA).

O crowdfunding

O diñeiro recaudado neste crowdfunding vai estar destinado a cubrir diferentes necesidades da produción do filme, como poden ser o aluguer de material técnico ou os gastos de promoción e distribución.

Cando te unes á rebelión da lectura, podes obter recompensas en agredecemento pola túa doazón. Hai 9 categorías, inspiradas en diferentes personaxes de contos infantís. Entre as recompensas que podes conseguir, temos: merchandising oficial do documental (camisetas, bolsas de tea, marcapáxinas e chapas), un sorteo do libro "Os ollos do Contomar" e outros de packs de libros das diversas editoriais socio-protectoras de Espazo Lectura.

Redes

Podes informarte máis sobre o proxecto, e seguir todas as novidades no noso Instagram: A rebelión da lectura.

Se queres saber máis sobre Espazo Lectura, podes consultar o seu Instagram ou a súa páxina web.

.

Moitas grazas por unirte á rebelión da lectura! Estaremos esperándote en Gondomar.