Craic Agus Ceol. Música y Músicos Celtes

EL PROYECTU

Va unos años, abondos años en realidá (nun voi dicir cuántos), afayé l'Arte Celta gracies a la música folk. Sentíme esteláu por aquellos complexos ornamientos qu'aparecíen davezu nes carpetes los discos d'Alan Stivell y otros, que llegaben con cuentagotes, d'Irlanda o Bretaña na era pre-internet. Asina de trivial foi'l mio entamu nel mundu de la illustración: faciendo por ser quién a imitar los dibuxos que salíen nes carpetes de vieyos discos de folk célticu.

Enxamás pensara qu'aquel inocente hobby acabaría siendo'l mio oficiu. Cuando entame a dibuxar profesionalmente, la Música Celta, foi casi siempres fonte d'inspiración y, munches vegaes, tamién protagonista de los mios diseños. Nos caberos meses esti enclín foi a más y casi tolo que dibuxu ta rellacionáu cola música.

Agora toca presentavos toes eses illustraciones rellacionaes cola Música Celta arrexuntaes nun volume monográficu, nel que rescato vieyes illustraciones realizaes pa'l Cáceres Irish Fleadh o'l Festival Intercélticu d'Avilés; al pie de otres illustraciones que nun llegaron a imprenta y quedáron descartaes y escaecíes en caxones; y, tamién, una montonera de nuevos diseños creaos para Craic Agus Ceol. Esti llibru ye un homenaxe gráficu a esi xéneru musical que me fixo esfrutar tantu y a los homes y muyeres que lo faen posible, rescatando y reinterpretando vieyes melodíes casi escaecíes.

Craic Agus Ceol, el llibru

El títulu, Craic Agus Ceol, ye una espresión popular irlandesa que significa lliteralmente "folixa y música" y espeya lo que naguo por representar nesti llibru: la euforia y les emociones que ye quien a tresmitinos la Música Celta, pero espresada d'una forma gráfica en cuenta de sonora.

Con esti crowdfunding pretendo financiar una tirada curtia de llibros (ente 300 y 500 exemplares) editaos con tol mimu y detalle que podamos da-yos. Nun se trata d'editar un blockbuster sinón un pequenu llibru de luxu destináu a ser xuna pieza de coleición p'amantes de la Música y el Arte Celta.

Partimos d'un mínimu de financiamientu de 3500€ que sirviríen pa editar 300 exemplares d'un volume de 150 páxines (papel estucado mate de 115gr), con 50 ilustraciones y tapa dura.

De llograr atropar más de los 3500€ de recaldación, el supéravit diría destináu nel so mayor parte a aumentar la calidá física del llibru, aumentando'l gramaxe del papel usáu na edición, el númberu de páxines y el númberu d'illustraciones impreses a tou color. N'últimu términu a aumentar la tirada que, en nengún casu, va superar los 500 exemplares.

COLLABORADORES

Diseñamos tola campaña de financiamientu y una llínea de merchandising personalizáu con imaxes del proyectu, sol asesoramientu de Bulnes Escuela de Negocios (Lleón).

Implicamos a un par de los meyores luthiers asturianos d'anguaño como son Pablo Bango d'Avilés (whistles y gaites) y El Busgosu de Cuideiru (percusión tradicional) pa, amás, poder ufiertar como rcompenses instrumentos musicales artesanos de calidá profesional. Artesanía musical de Km Cero.

Y tamién vais tener ente les recompenses amueses de la meyor Música Celta y la meyor lliteratura fantástica que s'ellaboren n'Asturies d'anguaño. Helena Seoane (Castrillón), autora de la novela Morgana, la otra discípula de la Diosa, y Guieldu, una de les nueves y más prometedores bandes de folk celta de l'actualidá, van ser protagonistes nun par de packs con recompenses bien especiales.

Esa collaboración va dir más alló de les recompenses, el llibru tamién va incluyir aportaciones de dellos destacaos miembros de la comunidá celta del estáu (que vamos dir desvelando adulces).

EL CALENDARIU

D'algamase'l financiamientu'l proyeutu, Craic Agus Ceol entra na so recta final, yá llevo meses trabayando nello y, agora, sería tiempu d'escoyer y facer esbilla ente tol material gráficu qu'arrexunté na mio carrera, escoyer qué hai que refugar y qué tien de tar incluyíu. Ye un trabayu duru pa un autor, porque nos cuesta enforma refugar obres nes qu'invertimos enfotu y ciñu... y tamién porque siempres creemos que, les bones, podríen ser entá ameyores añadiendo esto o quitando aquello. Pa nun eternizase nesa fase del proyectu lo meyor ye marcar unos plazos, asina que, la fase de diseñu del conteníu y maquetación tendría de tar finada en xunetu, pa mandar el llibru a imprenta y que tea llistu p'apurrir a los veceros na seronda.

• Sigui'l proyeutu tamién nel mio Instagram

• Tamién tamos en facebook