Depués d'Ochobre: Perestroika

Introducción

Marcharon los guerrilleros, marcharon los revolucionarios, marcharon tamién los héroes d’Ochobre. Los xenerales y mariscales yá nun ganen los galones y les medayes batallando nel frente, sinón faciendo amigos nos despachos de Moscú. Yá nun queden paisanos y paisanes de verdá. Los vieyos, los que mos deprendieron a lluchar y a vivir con dignidá, los que vieron nacer una mañana d'ochobre aquel país solu, a los pies del Atlánticu, que bien ceo foi la más occidental de les repúbliques socialistes soviétiques. Poco queda yá d'aquel mundu de pote y colomina, de la que foi la Patria de Belarmino.

La RSSA sigue esistiendo, sí. Pero onde había soldaos güei hai burócrates, onde había militantes comprometíos y comisarios políticos implacables, güei hai “Apparátchik” y onde había esperanza güei hai apatía. La desestalinización y l’estakhanovismu dexaron pasu al estancamientu, los coros mineros al VIA y al rock y la disciplina y los gulags a les amnistíes. En definitiva, onde taba la URSS de siempre, güei queda namás eso qu ellamen "Perestroika".

Pero nun t'esmolezas. Nun ta too perdío. El KGB nun morrió. Medró más que nunca y ta tan vivu como siempre. La URSS nun cayó, anque dellos dicen que-y queda poco, y anque'l Camarada Secretariu Xeneral Areces paez que quier esaniciar la RSSA, son munchos los que van impidí-ylo.

Nun conozo Depués d'Ochobre ¿Qué ye?

Depués d'Ochobre ye un xuegu de rol d'espíes que busca trayenos lo meyor de les histories de la Guerra Fría: la tensión, la infiltración, les dobles vides, los micrófonos tapecíos y los pasaportes falsos de milenta naciones na guantera del coche. Esti xuegu de rol publicóse en 2020 n'asturianu y castellán en toa España; y podéis ver el verkami equí desplicándovos too.

Entós... ¿Cuála ye la diferencia ente Depués d'Ochobre y Depués d'Ochobre: Perestroika?

En Depués d'Ochobre dímosvos trés coses: Un lore de la RSSA de 1934 a 1970, unes regles pa xugar al rol y una hestoria (delles nel casu de los que fuistis mecenes) ambientaes nesa época (1934-1970).

En Depués d'Ochobre: Perestroika vamos reeditar eses mesmes regles (con axustes), esi mesmu lore y esa mesma hestoria. Ye dicir, vamos a reeditar la totalidá del llibru básicu de Depués d'Ochobre (24,90€). Y, a mayores, sumamos:

• El lore 1970-1991: Delles decenes de páxines más colo que pasó n'Asturies ente 1970 y 1991: los movimientos culturales, los cambios nos llideralgos, les guerres, los acontecimientos deportivos, la esploración espacial, el Golpe d'Estáu, el Contragolpe y, sí, la cayida de la URSS y lo que-y pasó a Asturies en 1991.

• Hestories pa xugar al rol (1970-1991): Como fiximos en Depués d'Ochobre, apurrimos otra hestoria más y munches otres si se desbloquien los distintos llogros.

¿Cómo ye'l llibru físicu de Depués d'Ochobre: Perestroika?

El llibru va ser en formatu A4, como pasó col anterior, namás qu'esta vuelta va ser a color y, como la otra, vez podéis escoyer si lu queréis n'asturianu o en castellano. El total de páxines entá nun sabemos de cuántes va ser, pero calculamos qu'ande alredor de 200, seguramente más.

¿Cómo ye la RSSA?

EL patriotismu, la conciencia de clase y ¡ l'arguyu obreru que carauterizaren la RSSA de los primeros años, dexaron pasu a una sociedá más resignada y escéutica; frutu de les reformes de Gorbachov en Moscú y d'Areces n'Uviéu, pero tamién de l'aición incansable y desestabilizadora de la CIA, el MI5 y DGSE, pero tamién del CESID franquista y d'El Servei catalán (capitalista).

Nel planu cultural la URSS y la RSSA tán en plena efervescencia. Los mozos xueguen a videoxuegos como'l Tetris, Perestroika o ¡Somarín n'El Musel! y, cuando nun lo faen, lleen cómics de superhéroes soviéticos como Supermineru & Dinamitadora, históricos-épicos como Les Aventures del Caballeru Vellido Dolfos o noveles romántiques ambientaes nos campus de les universidaes asturianes como "Campus de Santuyano".

El cine tamién ta en plenu apoxéu, sobre manera desque saliere la franquicia KOSMOFLOT, la primer Space Opera soviética que superó en ventes a STAR WARS en tol mundu. Amás, la llegada de munchos direutores filocomunistes dende Canadá, EEUU y Europa nun fixo más que da-y al cine soviéticu de Mieres l'emburrión que precisaba pa ser el más destacáu del mundu... ¡A arrascala, Hollywood!

Nel planu musical hebo tamién un esporpolle grande. Los asturianos y asturianes de finales de los 80 escuchen de too, dende VIA soviéticu a rock y punk, pasando pela música celto-soviética y la neotonada; destaquen músicos como Tino Casal o Victor Manuel, dos de les grandes baces coles que cuenta Asturies pa ganar el Festival d'Eurovisión. No gastronómico hebo anovaciones, les sidreríes popularizáronse, les tabiernes ruses foron a menos y el Cachopu convirtióse en parte del menú habitual de les tripulaciones soviétiques. En lliteratura llegó con puxu'l movimientu Surdimientu Democráticu, que reivindica dexar pa prau l'alfabetu cirílicu y volver a escribir l'asturianu col llatín, nél, Sánchez Vicente ye una de les figures más destacaes.

No político, siguen les reformes d'Areces-Gorbachov, mientres que voces fuera del partíu déxense oyer, pente les que destaca la de De Lorenzo, un cabezaleru políticu que pide más democracia y lliberalismu económicu y que sabe llegar a la xente, gracies a un estilu populista y cercanu. Coméntase tamién que los militares tán falando d'aparar les coses "pela de males"; dalgo no que'l KGB va tener, claramente, muncho que dicir.

¿Qué Stretch goals o oxetivos d'allargamientu hai?

IMPORTANTE: Los stretch goals o llogros d'allargamientu nun van tar disponibles na edición en tiendes, sinón únicamente pa les persones que participaron nel crowdfunding. Si se saquen a la venta en tiendes, sedrá nun suplementu. Por eso, si punxisti perres, interésate que les ponga más xente y asina lleves un xuegu más completu. ¡Nun duldes n'esparder la nuesa iniciativa!

¿Qué voi consiguir con Depués d'Ochobre: Perestroika?

Si participes nel mecenalgu de Depués d'Ochobre: Perestroika vas consiguir:

• El llibru de Depués d'Ochobre: Perestroika

• Les aventures y posters que se desbloquien. Si, como la última vez, recaldamos más perres de les que precisamos, vamos dir axuntando aventures.

• Un códigu especial pa mecenes que participaron nesti proyeutu. Con él, nel prósimu que llancemos, vais consiguir regalos y/o descuentos.

Stretch goals

Por cada 500€ perriba de la barrera que mos fixamos (2.500€), vamos desbloquiar un stretch goal. Los tres primeros (3.000, 3.500 y 4.000) van ser aventures, el cuartu (4.500) les ilustraciones d'eses trés, los siguientes aventures y el siguiente una ilustración pa caúna d'elles.

Les aventures que se van poder desbloquiar son (non necesariamente n'orde)

• Aventura "Operación Home del Sacu: a la gueta de les cries del aigla": Tres la espulsión de los nazis d'Asturies el gobiernu de Belarmino Tomás entama una gran redada pa eliminar los axentes estranxeros y enzarrar en Vil.lablino al enemigu interior. (d'Andrés Fernández)

• Aventura "Operación Overseas": El MI6, preocupáu pol apoyu soviéticu al IRA nos "Troubles" manda un comandu a investigar el puertu de Xixón, ¿Atoparán les armes que tanto busquen" (d'Andrés Fernández)

• Aventura "American Cross": El robu de La Cruz de la Victoria foi la mayor afrenta a Asturies y a la URSS. Ponte nel pelleyu del equipu del Segundu Directoriu que tuvo que desarticular la operación y evitar que la Cruz de la Victoria acabare espuesta nel Metropolitan de Nueva York. (de Nicolás Bardio)

-** Aventura "Vieyes deldes: venganza nel conu sur":** los montoneros traten d'eliminar a un burócrata de l'alministración López-Rega que llegó a l'Arxentina escapando del NKVD astur-soviéticu. Na operación los montoneros descubrirán que nun son los únicos naguando por cobrar venganza.":

• Aventura: "GTA: La Felguera". La URSS ta acabante de cayer, y con ella, en parte, l'estáu. Nes Cuenques manda el "Gremiu del Trabayu Asturianu", o, como lu conocen na zona "El Sindicatu". Pa facese ricu hai que facer negocios con él sí o sí y nun lleva-y la contraria a M. A. Villa. La democracia nun foi lo único que vieno d'occidente, tamién la droga. ¿Vas ser un pandilleru? ¿O vas querer más los crímenes de guante blancu?

• "Asturias, twelve points; Les Asturies, douze points": La URSS cayó va unos pocos meses, pero los servicios secretos asturianos tovía tienen muncho que dicir na transición a la democracia. El Presidente De Lorenzo encargó-yos una xera: Tino Casal tien que ganar Eurovisión 1992 "cueste lo que cueste". (de Nicolás Bardio)

• Aventura "Fraude Eleutoral!": Xunu de 1991. La URSS nun cayó pero quéda-y poco. Celébrense les primeres eleiciones multipartidistes na RSSA y el KGB ta dividíu ente quienes quieren asegurar una victoria de la UHP-PCUS "cueste lo que cueste" y los que quieren protexer la democracia. (de Nicolás Bardio)

¿Qué recompenses hai?

Amás del libru básicu, vas ver unes cuantes opciones de recompenses. Dende la camiseta col escudu de la RSSA hasta postales col arte del primer Depués d'Ochobre pasando per pins o más coses. Amás de les recompenses, tenemos trés add-on pa da-y más realismu a la ficción ucrónica astursoviética.

Nos 80, la URSS abrió la mano pa con Asturies. Col beneplácitu d'occidente, que quería facese perdonar el robu de la Cruz de la Victoria, Asturies tuvo asientu na Asamblea Xeneral de la ONU, al igual que pasaba yá con Ucraína y Bielorrusia. Con too, lo que más-yos prestó a los asturianos y asturianes foi ver a la so seleición nacional xugar el mundial d'España de 1982. Asturies ganó a Cuba y a Bélxica, pero acabó derrotada escontra Yugoslavia por 2-1.

La bandera oficial de la RSSA, volvemos a reeditala.

La bandera de la República Asturiana, proclamada tres de la cayida de la URSS. Esta bandera, cola estrella blanca de la democracia y la llucha, usóse como bandera de llucha y más alantre la nueva Xunta Xeneral de la República, adoptaríala como bandera oficial de la nueva república europea.

Quién somos

Ediciones Radagast nació nesta mesma plataforma va 5 años con "Depués d'Ochobre". Depués de media década andando gracies al vuesu sofitu y al vuesu interés, volvemos con otru proyeutu guapu que davos.

• Autor de los testos: Nicolás Bardio

• Autor de les imáxenes: Xon de la Campa.

Calendariu previstu

La fecha d'entrega prevista ye 1 de xunu de 2025. Sicasí, de desbloquiase más metes, la fecha d'entrega podría retrasase.

+ Info

Si quies tar en contautu con nós o facenos cualquier entruga, nun duldes n'axuntanos nes redes sociales:

• Síguinos en en Twitter

• Conoz lo que foi Depués d'Ochobre