PRO-TEJIÉNDONOS, emakumeen proiektu kolektiboa.

NOR GARA

PRO-TEJIÉNDONOS emakumeen proiektu kolektiboa da. Abya Yalako (Erdialdeko Amerika) lurraldeetan natura eta bizimodua babesteagatik kriminalizazioa eta jazarpena jasaten duten emakume defendatzaileen eta euskal emakumeen istorioak ehuntzen joan den adiskidetasun eta miresmen sarea da.

HELBURUAK

BABESLEAK ipuin ilustratua argitaratzea. Beraien lurraldeak espoliatzen dituzten interes ekonomiko transnazionalen mehatxupean bizi diren emakumeak ikusarazteko eta haien aurka egiteagatik erail dituztenen oroimena ohoratzeko.

Babesten dutenak, bizitza erdian jartzen dutenak BABESTEA, bizirik, osasuntsu eta aske egoten lagunduko dien nazioarteko segurtasun- eta kontzientzia kolektiboko- sare bat ehunduz. Beren lurraldeetan harmonian bizitzeko eta, nahi izanez gero, bakarrik mugitzeko aukera eman diezaieten.

IPUINAREN DESKRIPZIOA

BABESLEAK adin guztientzako ipuina da, helduentzako, nerabeentzako eta haurrentzako egokia, naturaren balioa eta babesteko dugun erantzukizuna gogorarazten diguna.

Egia esan, ipuin bat baino askoz gehiago da. Adimenak eraldatzeko eta bihotzak sentsibilizatzeko tresna bat da, eta horren bidez jende gehiago inplikatu nahi dugu amesten dugun beste mundu posible hori eraikitzen, non emakumeak eta herriak askeak izango garen eta gure bizitzak sostengatzen dituen natura zainduko dugun.

BABESLEAK ipuinak 40 orrialde izango ditu, Haizea Murgiak aukeratutako hitz zehatz eta politekin eta Andrea Condek sortutako 15 ilustrazio zoragarrirekin, babestuz gu ehundu ehotutako istorio hau kontatzeko.

VALIENTAS bildumako lehen ipuina da, beren bizitzak, autonomia eta eskubideak defendatzen dituzten eta mundu bizigarriago batekin amets egiten duten emakume garaikideen kolektiboen borrokak eta ekimenak ikusarazteko sortua.

Bi hizkuntzatan argitaratuko da, gaztelaniaren eta euskararen artean aukeratzeko.

ZERTARA BIDERATUKO DITUGU ZUEN EKARPENAK

Zure ekarpenak emakume defendatzaileei laguntza ekonomikoa ematea ahalbidetuko liguke. Bizitza babesteko, beraien lurraldeetatik burua ihes egitera behartuak izan direnak, gehien maite dutena atzean utzita, eta beraien egoera hobetzen ari den bitartean duintasunez eusteko beharrezko baliabiderik ez duten emakumeak.

Hori dela eta, lortu beharreko gutxieneko zenbatekoa ipuina egia bihurtzeko eta argitaratzeko kostuetara bideratuko da. Hala ere, kopuru hori gainditu nahi dugu, emakume defendatzaileen beharrei ahalik eta denbora luzeenean lagundu ahal izateko.

MÁS MUJERES elkarteak bultzatutako proiektu honi esker egin ahal izango dugu. Lagun iezaguzu ahalik eta emakume defendatzaile gehienei laguntzen!

ZE EMAKUMERI LAGUNDU NAHI DIOGU

Abya Yala eskualdeko (Erdialdeko Amerika) emakumeak, euren lurraldeetan erauzte-proiektuei aurka egiteagatik jazartzen zaizkienak eta euren bizitzak salbatzeko bertan behera uztera behartuta daudenak. Egoera hau bereziki larria da Kolonbian, Brasilen, Mexikon, Hondurasen, Guatemalan, Venezuelan eta Nikaraguan.

Munduko populazioaren % 5 baino ez bada ere, herri indigenak dira erasotuenak, eta, hala ere, gure planetako biodibertsitatearen zatirik handiena babesten dutenak dira. Hain zuzen ere, beren bizimodu iraunkor eta naturarekiko harmonikoak munduan nagusi den kontsumo-erritmoak eskatzen dituen baliabideen premia gero eta handiagoei aurre egin behar dietelako.

2017 eta 2018 urteetan zehar, 65 defendatzaile hil zituzten, 27k erailketa saiakerak jasan zituzten Erdialdeko Amerikan eta 3.305ek erasoak jasan zituzten, gehienak behin eta berriz (Iniciativa Mesoamericana de Defensorasen txostena). Kezkagarria da datu horiek aurreko biurtekoa bikoiztea.

Lurrerako eta ingurumen osasuntsurako eskubidea defendatzen duten emakumeek mehatxu espezifikoei aurre egin behar diete, gizonek aurre egin beharrekoez gain.

Difamazio-kanpainak emakume defendatzaileen bizitza pribatuan zentratzen dira, eduki sexista edo sexual esplizituarekin. Sexu-indarkeria, normalean salatzen ez dena, defendatzaileak isilarazteko taktika gisa ere erabiltzen da. Lidergo-postuetan dauden emakumeak estigmatizatu egiten dira, ohiko genero-rolen aurka daudelako.

Jazarpen hori ez da amaitu konfinamenduarekin eta pandemiarekin. Eskualdeko 10 emakume defendatzaile hil dituzte aurten, eta askok mehatxatuta eta jazarrita jarraitzen dute. Gutxi gorabehera erdiek ez dute baliabide nahikorik beren oinarrizko beharrak edo.

NOLA SORTZEN DA EKIMENA

Zur-enpresen aurkako borrokari lotutako hainbat hilketa-saiakeraren ondoren ihes egin behar izan ostean, Lolita Chávez maia k'iche' defendatzaile guatemalarra 2017ko eta 2018ko hilabete batzuetan zehar Europan babestuta egon zen.

Hemen zegoela Estatu osoko erakunde eta mugimendu sozialekin sare zabal bat ehundu zuen, eta Eusko Jaurlaritzak ematen duen Giza Eskubideen Ellacuría saria jaso zuen baita.

Halaber, antzeko bidegabekeriak jasaten dituzten emakumeen borrokak babesten jarraitu nahi dugun emakume-talde batekin laguntasun estua sortu zuen.

Horretarako, BABESLEAK ipuina lehen urrats gisa asmatzea bururatu zitzaigun.

SARETUTAKO EMAKUMEAK ondokoak gara:

IDEOLOGOAK (eta endredatzaileak)

Cris (Cristina Alba) - Ameslaria eta feminista, irribarre handikoa eta metxa motzekoa. Batez ere, bizizalea, munduan zehar izandako bizitza guztiez gozatu dudalako. Batik bat, Abya Yalako txokoetan. Emakume eta herri indigenen borrokak aurkitzeak bulkatu ninduen. Hauek bultzatzen jarraitzen dut, ikasten eta ipuin honen moduko proiektuekin gogoberotzen jarraituz.

Yoli (Yolanda Barco) - Feminista suhartsua. Nire bidea emakumeak eta beste hainbat kolektibo zapaldu egiten gaituen sistema heteropatriarkal eta kapitalista aldatzera bideratuta egon da beti. Hainbat kulturatako emakumeekin izan ditudan bizipenek eta izan dituzten borrokek nire ahalduntzea eragin dute.

Lolita (Aura Lolita Chávez) - Defendatzailea eta maia k'iche' feminista komunitarioa. Kosmogonia eta lurraldearekiko eta naturarekiko lotura noan lekura eramaten dut. Aldarrikapenez, ametsez eta barrez kutsatzen ditut babesten ditudan pertsona eta mugimendu guztiak.

IPUINLARIA (eta ahoberoa):

Haizea Murgia (Malabarizia) - Aktibista feminista, klown, antzerki, inprobisazio, performance eta poesiaren artean bizi naiz, eta, beraz, nire unibertsoa orainaz, emozioz eta gardentasunez bustitzen da. Uzten didaten lekuan prestatzen, antzezten, errezitatzen eta zarata ateratzen jarraitzen dut.

ITZULTZAILEA (eta euskaltzalea):

Lore (Lorea Undagoitia) - Feminista euskalduna eta munduan ibiltzailea. Nire une libreetan pailazoa. Beste mundu bat posible izan dadin amesten eta jarduten dut. Hezkuntzaren bidez iraultza datorrela uste dudan pertsonetakoa naiz. Mendia eta bere gordelekuak maite ditut. Bidegabekeriengatik borrokatzen naiz irribarrea galdu gabe.

ILUSTRATZAILEA (eta ilustratua):

Andrea Conde - Eguneko diseinatzaile grafikoa, gaueko ilustratzailea. Istorioak eta bidaiak maite ditut, azkenean ia gauza bera dira. Jendartea hobetu ahal izatearen kontzeptuaren defendatzailea naiz, ikusmintzairaren bidez mundu guztiak eskuragarri izan dezakeen sorkuntzak eginez.

KOMUNIKATZAILEA (eta berritsua):

Vir (Virginia Enebral) - Kasualitatez arkitektoa eta kausalitatez kazetaria. Kuxkuxera, konformagaitza eta marmartia — ipurterrea, hara —, munduak imajinatzen ditut egungotik jaitsi beharrik ez izateko. Feminista konbentzitua, motxilan borrokarako eta aldarrikapenerako gogoa daramat. Mundua hitzekin edo irudiekin berraurkitzea gustatzen zait, baina beti elkarrizketa on batekin.

Ezinezkoa beraien laguntza estimaezina (eta estimatua) gabe: Idily Mérida eta Amaia Iguaran.

AURREIKUSITAKO EGUTEGIA

Gaur egun, BABESLEAK egokitzapen- eta ilustrazio-prozesuan dago. Otsailaren erdialdean maketatuta eta inprentarako prest izango dugu. Eta martxoaren 8a aldera emango dizkizuegu aukeratutako produktuak.

GABONETAN, ELKARKIDETASUNA: OPARITU DUINTASUNA

Gabonetan edo urtebetetzean norbaitek BABESLEAK ipuinagatik TXARTEL bat jasotzea nahi baduzu, eska iezaguzu zure TXARTELA gure [email protected] helbidean, e-mailez edo postaz bidaltzea nahiago duzun adieraziz eta hartzailearen helbidea emanez.

Berehala Olentzerori, Mari Domingiri edo zure konfiantzako Errege Magoari azalduko diogu, martxoan liburua jasoko duzun prozesuari hasiera emateko. Gogoratu zein hizkuntzatan nahi duzun zure liburua(k) adieraztea; euskararen eta gaztelaniaren artean aukeratuz.

+ INFO

• Jarrai ezazu proiektua egunetik egunera gure Facebookeko orrian: Cuento Protectoras - Colección Valientas

• MÁS MUJERES elkartearen lehen egitasmoan laguntzen ari zara. Elkartearen helburuak eta filosofia hobeto ezagutzeko bisita gaitzazu gure web orrialdean: www.masmujeresongd.org