Unindo voces: Coral polifónica Casto Sampedro

Desde a Asociación Latexos estamos comprometidos en crear unha coral de veciños e veciñas de Redondela que leve o nome de Casto Sampedro Folgar, o folclorista e investigador da arqueoloxía nado en Redondela en 1848 e finado en Pontevedra en 1937. Foi o autor do primeiro cancioneiro galego no que, xunto ás letras, incorporou tamén as músicas.

O obxectivo deste proxecto é reunir a persoas apaixonadas pola música, independentemente da súa idade e o seu nivel de experiencia, para formar unha agrupación coral que represente a nosa vila, que faga comunidade, que co soar das nosas voces xere dinamismo no noso pobo, que sexa lugar de encontro e acollida, xuntando na música o alento máis popular e a descuberta da súa dimensión culta.

E como de sempre foi Redondela unha vila cantora, a nosa coral está aberta a todos os veciños e veciñas do concello que desexen participar.

E algo moi importante!: Non se require experiencia previa en canto ou música, só ganas de compartir momentos e emocións a través da música.

Durante os ensaios teremos a oportunidade de aprender a cantar, de mellorar as nosas habilidades vocais para, a partir de aí, participar en concertos que nos permitan, celebrando a nosa cultura e tradición local, chegar a máis persoas dentro e fóra de Redondela.

A posta en marcha desta iniciativa precisa recadar fondos para:

● A adquisición do material básico necesario que sexa accesible para todxs os e as que queiran participar.
● A remuneración dunha profesional da música cunha formación contrastada e cunha personalidade artística que nos guíe no proceso de creación e crecemento do noso coro e lle confira a éste unha personalidade propia.
● O desenvolvemento dunha identidade visual coa que se nos poida identificar facilmente.

Os obxectivos son:

● Crear un coro que sexa unha iniciativa cívica onde as persoas membros están comprometidas non só como intérpretes senón tamén como socias na toma de decisións e no seu sostemento económico.
● Crear un espazo acolledor, colectivo e inclusivo onde veciñas e veciños se poidan encontrar para compartir e desenvolver a súa paixón pola música.
● Fomentar o sentido de comunidade e o seu dinamismo a través de algo tan propio entre nós durante xeracións como a música coral.
● Enriquecer a vida social e cultural local.
● Compartir o noso traballo e dedicación coas xentes de Redondela, e representala no mellor de si coas da comarca, de Galicia toda...

Se queres participar activamente na coral escríbenos ao seguinte correo: *[email protected]*
A nosa cota é de 10€ mensuais.

Se só queres apoiar o proxecto, temos unha serie de recompensas e recoñecementos adaptados a todas as posibilidades:

• Agradecementos públicos e entradas ao concerto de presentación que se celabrará en Redondela, entradas a todos os concertos que se realicen durante o primeiro ano en lugares que están por determinar.

• Camisetas e broches co logo da coral.

*Invitación para unha clase especial de técnica vocal a cargo dun/ha profesional experto/a.

*Nome como patrocinador/a oficial na nosa páxina na Redes e materiais de promoción durante o primeiro ano.

Calendario:

Fase 1 - Recadación de fondos (1 mes):
O primeiro paso será acadar o financiamento necesario para cubrir os custos iniciais. Buscaremos que a comunidade local se implique, facendo saber a todos a importancia de formar parte deste proxecto.

Fase 2 - Recrutamento e ensaios (2 meses):
Comezaremos os ensaios en canto se recollan os fondos necesarios, e ao longo deste mes afianzaremos a nosa formación.

Fase 3 - Primeiras actuacións e presentacións (a partir do 4º mes):
Coas primeiras actuacións, queremos levar a coral ás rúas e prazas de Redondela, así como a festivais culturais locais para darnos a coñecer.

O noso compromiso:

A Coral non será só un grupo de música, senón un espazo aberto a todos os veciños e veciñas para compartir a emoción de crear algo xuntos. Prometemos que cada persoa, sen importar a súa idade ou experiencia, terá un papel importante nesta iniciativa.

Contribúe a facer realidade este soño!

A túa axuda será fundamental para que se faga realidade e poidas formar parte desta iniciativa cultural de Redondela.

O noso obxectivo é reunir os fondos necesarios para poñer en marcha a coral, e o teu apoio fará que isto sexa posible!

Escolle a túa recompensa!!