Entruidos e Mascaradas na Galiza

Na língua galega existem muitas maneiras de dizer Entruido: Antroido, Entroido, Entrudio, Antruido, Introido, Entrudo, Antroiro, Entroiro, Antroito... e todas derivam do latim Introitus, que significa introduçom.

Mas este livro nom fala só de Entruido, fala também das Mascaradas e de todo o conjunto de rituais que fam parte do Ciclo Festivo de Inverno, umhas das celebraçons mais genuínas do país, um tempo de fortalecimento da comunidade em que encher o espaço físico comum, a aldeia, a paróquia...

Desordem ordenada, subversom de hierarquias, mudanças de papéis, apariçom de seres chegados de outro mundo (boteiros, carantonhos, farrumecos...), animais que trazem a primavera e o renascer da vida (ursos, galos, vacas...), personagens engalanadas com um agir elegante... Encontrarás todo isto e muito mais neste nosso guía dos Entruidos e Mascaradas na Galiza.

OBJETIVO DA CAMPANHA

Queremos editar um guía que mostre às crianças e às adultas, de modo visual, as máscaras e roupas que formam o centro destas celebraçons. Um guia prático onde obter informaçom sobre os rituais do Ciclo Festivo de Inverno com a intençom de difundir conhecimento e colaborar com a difusom e conservaçom da nossa identidade.

O NOSSO LIVRO DE MASCARADAS

O nosso livro achega 146 máscaras distribuídas em 122 desenhos, convertendo-se assi no maior guia visual das mascaradas do país.

Criaremos um material de qualidade, impresso em offset, com capa dura e um tamanho de 21x27.

As imagens irám acompanhadas por umha breve explicaçom do seu agir, a sua localizaçom geográfica e explicaçons que tanto fam referência a generalidades do ciclo festivo tradicional galego de inverno como a mascaradas mais locais e concretas.

O livro Entruidos e Mascaradas na Galiza é fruto dumha experiência anterior. No ano 2017 a Escola de Ensino Galego Semente Compostela editou um caderno de campo que combinava desenhos e atividades fundamentalmente dirigidas a crianças.

RECOMPENSAS

Dá umha vista de olhos a estas magníficas recompensas criadas em exclusiva para esta campanha no Verkami onde contamos com a colaboraçom de duas artistas incríveis:

Ana Miguéns é umha moça de Vila Garcia que começou desde mui pequena modelando a sua propia bijutaria. As suas peças estám inspiradas nas paisagens, cultura e tradiçons galegas e nós destacamos a sua Coleçom do Entruido.

Podes ver as suas criaçons em https://anamiguens.com/

Sergio Casas é um ilustrador de Compostela especializado nos últimos 20 anos em desenvolvimento visual para filmes de animaçom. Na sua trajetória profissional tem trabalhado para Netflix, Illumination, Aardman e Dreamworks entre outras.

Podes ver parte dos seus trabalhos em http://sergiocasas.net/

Quando as recompensas estiverem prontas chegará-vos umha notificaçom a casa para que passedes a recolher a vossa nos Correios.

QUEM SOMOS

A SEMENTE

Nas Escolas de Ensino Galego Semente sabemos a importáncia que tem tecer comunidade.

As Escolas de Ensino Galego Semente som umha entidade social amplamente conhecida no país que pretende conformar, junto com outros projetos semelhantes, as bases necessárias para a criaçom da Escola Nacional Galega e tem criado material de qualidade mui variado com a intençom de difundir aspetos da nossa história e cultura e melhorar a realidade do nosso contexto social.

AS PESSOAS

A equipa que trabalha neste projeto está integrada por pessoas da extensa comunidade que forma as nossas escolas.

Oscar Soutelo, além de ser o armadanças deste projeto é o criador dos desenhos e dos conteúdos. Mas provavelmente polo que mais destaca é por ser um freak entusiasta de quanta foliada entruideira houver. Criou outro material ilustrado para a Semente, entre o qual destacamos o Baralho dos Mamíferos Terrestres na Galiza.

Olalla Diéguez Bóo foi a encarregada da diagramaçom e design do livro. Nativa de Matamá (Laça), leva o Entruido no sangue, e além de ser ilustradora, pinta as máscaras de Peliqueiro que constrói o seu pai, Paco.

Paco Diéguez Blanco, natural de Matamá (Laça), é o criador do limiar deste livro, artesao de máscaras de Peliqueiro e virtuoso da talha em madeira. Este apaixonado polo Entruido também personificou durante muito tempo a Morena e o Testamenteiro do Burro na sua paróquia natal.

Nacho Munilla é um reconhecido ecólogo e paxareiro ourensano criador, junto com Pancho Lapeña, da magnífica série das Guías Definitivas: A Guía Definitiva das Aves da Galiza, a dos Peixes, a de Anfibios e Répteis e a de Mamíferos divulgadas através desta plataforma. Aproveitamos a sua experiência no Verkami para a preparaçom e o seguimento desta campanha.

Tamara Mosqueira é umha activista da Semente entusiasta dos Entruidos e a responsável de espalhar este projeto nas redes sociais. A ela devemos muito trabalho de campo imprescindível para a realizaçom deste livro e a maioria das fotografias que acompanham esta campanha.

DESTINO DAS ACHEGAS

A maior parte deste trabalho é fruto do esforço militante desinteressado da comunidade da Escola Semente Compostela. Portanto, o destino principal das achegas que se fagam através desta plataforma irá destinado ao pagamento da ediçom e dos custos de envio das recompensas.

O dinhero resultante destinará-se ao financiamento da Semente.

CALENDÁRIO PREVISTO

Temos previsto levar os livros à tipográfica umha vez atingido o objetivo mínimo da campanha. Faremos todo o possível por termos entregado as recompensas antes das férias de Natal e deste jeito ajudar o Apalpador a escolher o agasalho mais original para as vossas famílias e amizades.

REDES

Podes seguir este projeto no Instagram Semente Compostela e Instagram Semente Nacional

Também estamos em X Semente Compostela e em X Semente Nacional

Encontrarás-nos também em Facebook Semente Compostela e em Facebook Semente Nacional

Por último, descobre-nos no Youtube Semente Compostela e em Youtube Semente Nacional