Festival Internacional de la Gaita de Villaviciosa 2024

¡NECESITAMOS EL TO SOFITU P'AMPLIAR LOS CONCIERTOS AL DÍA D'ASTURIes!

Échanos un gabitu pa disfrutar d'un grandísimu festival y un auténticu día d'Asturias a l'asturiana, pa enllenar les cais de La Villa de música, cultura y gaita como nunca, participando nel crowfunding más asturianu y prestosu hasta'l momentu.

El festival va celebrase en Villaviciosa los díes 5, 6, 7, y 8 de setiembre de 2024. ¡Con programación propia, cola to ayuda, pal día d'Asturies!

¡Ven a Villaviciosa a disfrutar del más auténticu día d'Asturies!

Sofita de forma activa mercando una de les camisetes oficiales del festival, bolses, vasos, packs, etc., y tamién

UNA MONTERA ASTURIANA AUTÉNTICA recreada a costafecha pola prestixosa marca asturiana Made By Kös pal nuestru festival.

asina vas tar equipáu dafechu pa ser un festivaleru folkie de categoría.

Esti añu vamos tener n'esclusiva monteres edición especial F.I.G. confeccionaes por Madebykos, quien, de manera ALTRUISTA dafechu, quixo collaborar de esta forma tan guapa y asturiana con nós, ellaborando una montera basada na tradición, pero afayadiza al empar pal día a día modernu.

Nun pierdas tampoco la oportunidá de tar a la última colos nuestros diseños oficiales del F.I.G. 2024 realizaos pola diseñadora asturiana Nieves González @nieve_sita, a la vez que mos eches un gabitu pa poder entamar de la manera más prestosa'l que yá ye ún de los festivales folk más importantes d'Asturies.

Vas poder mercar camisetes, tote bags, o'l pack completu del F.I.G., qu'inclúi la montera picöna edición F.I.G, camiseta y la tote bag, amás d'una chapa, un vasu del F.I.G. 2024 y una pegatina del festival.

Nel casu de les camisetes mandarémoste un email con un cuestionariu pa escoyer la talla. Pa recoyeles va haber un puestu de la B.G.V. nel propiu festival. Y lo mesmo pa escoyer el color de la montera que más t'aguapie.

Les perres que se saquen van usase íntegres pa echar alantre'l festival.

El festival va cuntar con una programación cultural qu'inclúi conciertos, charres, esposiciones, nueche en danza, festival de bandes de gaites, nueche folk, mercáu artesanu, l'únicu alcuentru de luthiers d'Asturies, certame de tonada, concursu de gaiteros solistes... ¡y muncho más!

Amás, esti añu la nuestra programación coincide col día d'Asturies, fecha que nun queremos dexar pasar, ampliando la nuestra programación, colnto sofitu, pa crear el día d'Asturies más auténticu y que la nuestra tierra y Villaviciosa merez

¿Quién somos y qué facemos?

Somos la Banda de Gaites Villaviciosa “El Gaitero”, entidá cultural con más de 35 años d'historia, lo que nos convierte na banda de gaites asturiana que lleva más tiempu n'activu.

Dende la banda llevamos más de 35 años curiando la tradición y cultura propia, y yá van nada menos que 20 años que vinimos entamando'l F.I.G. (Festival Internacional de la Gaita de Villaviciosa) gracies al enfotu y al trabayu desinteresáu de los integrantes de la banda gaites, el sofitu del ayuntamientu y de los comerciantes, hosteleros y llagareros del conceyu: un eventu que la xente espera con ilusión añu tres d'añu, convirtiéndose nun de los principales referentes turísticos del Villaviciosa en veranu y ganando pesu a poco y a poco nel panorama de los festivales folk y intercélticos del norte la península.

¿Por qué una campaña de Crowdfunding?

L'añu pasáu, depués de dos años de formatu reducíu....poles restricciones derivaes del covid-19, volvimos al formatu “grande” del festival, y salimos a les cais de La Villa, enllenándoles de música, gaita y cultura.

Dende'l Festival Internacional de la Gaita de Villaviciosa asoleyamos esti crowdfunding porque tamos buscando apoyos nuevos de financiación.

Depués de tener que contentanos con un festival en formatu reducíu los últimos años de pandemia, atopámonos con unes ganes descomanaes de que'l festival vuelva al formatu orixinal, pero por desgracia también mos decatamos de les torgues que la subida xeneral de los precios nos pon a la de poder llevar a cabu'l festival talu como lu teníemos proyectáu pa esti añu.

Depués de plantegamos varies opciones, col fuelgu que nos da la bona acoyida que tuvo la última edición y queriendo tamién caltener l'espíritu divulgador y gratuitu del festival, decidímonos a echar alantre una fonte de financiación nueva como ye esta, pa poder siguir trayendo cultura al conceyu de Villaviciosa.

El festival ta pensáu como un escenariu nel que se pueda divulgar tol universu cultural que xira alredor del nuestru instrumento estrella, tótem y seña característica de la nuestra rexón.

La gaita, conector de cultures diverses d'Europa y presente de vieyo na nuestra historia y cultura.

Nestos años últimos incluyimos nel festival tola creación, espresión artística o cultural que tuviere relación con esti instrumentu: artesanos, músicos nacionales y internacionales de primera llinia, presentación de llibros, concursos, charres divulgatives, históriques, presentación d'estudios, tonada, festival de la sidra, bandes de gaites de dientro y fuera de la península, nueche en danza, baille y clases de baille de rexones europees diverses, arriendes d'asturianes, luthiers, artesanos del traxe’l país… Tou un mundu de cultura que tien como elementu conector la gaita.

Made By Kös y el festival:

Esti añu la prestixosa marca asturiana Made By Kös, famosa por vistir a Rodrigo Cuevas, Rozalén, Alba Flores o Rosi de Palma, quixo collaborar col festival, apoyándonos de manera desinteresada dafechu cola creación d'una llinia de les sos más que famoses MONTERES PICÖNES pa esti F.I.G. 2024.

Una forma perfecta de sofitar el festival diendo a la última nesti día d'Asturies 2024.

Y ye que nun se mos ocurre una manera más asturiana de celebralo que sacando daqué tan nuestro como ye la montera asturiana a la cai, na so versión más actual, válida pal día a día modernu.

Made By Kös defínese a sí mesmu como : L'amor pa cola tradición, la moda y lo fecho a mano que da como resultáu esti proyectu que bilta nuna aldea asturiana. La orixinalidá de los sos diseños cargaos de tintes históricos ye la nuestra seña d'dentidá. Y ye con esi espíritu col que faen esta prestosura de montera picöna, adaptada al 2024 y que de manera exclusiva vas poder mercar nel nuestru verkami 2024 pa ayudanos a estrar les cais de Villaviciosa de música, tradición y gaita.

Tolos beneficios van ser donaos de manera dafechu altruista por Made By Kös a la organización del festival.

Sigui toles novedaes del festival equí:
instagram