V.O.S. Nuevu discu de L-R

"La cousa ta en saber si ún ou una ía quién a vivir colas sos pasiones, en saber si puede afirmase: queimar el coral qu'al mesmu tiempu ta aponderando.”

Albert Camus

¿Por qué V.O.S.?

El proyectu L-R nacéu porque nós, Rubén ya Leti, entamamos a faenos entrugas al rodiu de cómo entendíamos la música, la cultura ou’l baille asturianu. D’estas conversaciones eternas al calor de llar apaecéu esa idega del post-folk-asturianu cola que tanto tamos deprendiendo ya esfrutando dende fae yá bien tiempu.

Asina, espueis de dellos años trabayando ya con dos discos espublizaos, abúltanos que supimos, a la nuesa manera, dir respondiendo a entrugas que pa nós fonon importantes:

¿Cómo suenan los llugares? ¿cómo representamos esi soníu na nuesa memoria collectiva? ¿de verdá cuenta la nuesa hestoria? ¿Ía inmóvil, alfa ya omega de la nuesa identidá, ou ía móvil, tresgresor ya subversivu...?

Con ello, la verdá ía que siguimos ensin tener rempuestas claras...Eso sí, paeznos que cada cual tien que buscar las sos propias rempuestas dende la so propia esperiencia.

Lo que ta claro (ía menos mal) ía que todxs tenemos bien dientro la nuesa propia “versión orixinal” cola so banda sonora “subtitulada”. Precisamente por esto, esti discu va llamase V.O.S.: por vusoutrxs, porque la música, ensin xente pa imaxinala de múltiples maneras, nun tendría sintíu.

V.O.S. venceya tres conceutos importantes: “versión”, “orixinal” ya “subtitulada”. Son importantes porque creyemos que la música de los pueblos ía un actu d’amor; dalgo pulsional que nunca nun vei ser nin orixinal, nin inamovible porque tresmítese siempre como versión; eso ía lo que fae que la so guapura miedre de voz en voz a lo llargo de los sieglos.

Esti discu que vas tener nas manos fala dende la voz de los llugares; fala dende la musicalidá de las pantasmas ya los símbolos. Nós, Rubén ía Leti, dámosvos dellos “subtítulos” pa que vusoutrxs mesmxs imaxineis a esa “voz ensin nome” que fai muncho más grande los soníos de la nuesa memoria collectiva.

¿Qué vais atoupar en V.O.S.?

Esti discu pieslla un ciclu na nuesa trayectoria, asina que vei ser mui especial en tolos sentíos. Veis atoupar, como siempres, el soníu L-R pero abriendo nuevas posibilidades sonoras; nuevas capas nas que afondar ya siguir trazando ya ensanchando el nueso universu musical.

Vamos tar mui bien acompañaos por grandes amigos ya artistas como Los Hermanos Cubero, el Coru Al l'altu la Lleva, ya munchos más que inda nun anunciamos ya vos diremos enseñando nos prósimos meses.

Ya sabéis...

El proyectu V.O.S. sigui apostando pola música asturiana averándose a outras creaciones más contemporáneas. Queremos fomentar nuevas maneras d’integrar na sociedá las músicas de raigañu. Las nuesas idegas siguin siendo las mesmas colas qu’entamábamos esta aventura musical allá nel 2016: entender ya difundir la música asturiana como dalgo vivu ya'n tresformación; un bien común qu'evoluciona colos tiempos ya las tendencias. Too ello dende la nuesa propia perspectiva ya dende la nuesa manera única ya personal de faer música.

¿Qué buscamos con esta campaña?

Queremos pidivos sofitu pa poder espublizar un discu de vinilu de V.O.S. Queremos apostar por esti formatu físicu porque, anque el discu vei tar en tolas plataformas dixitales, siguimos pensando no guapo que ía tocar ya sintir las cousas directamente; tenelas en casa ou querelas ya valoralas polo que son ya non por cómo imaxinamos que son.

Nós

L-R somos un dúu formáu por Leticia Baselgas (voz ya percusión) ya Rubén Bada (guitarras elléctricas, efectos, voz, percusión, vigulín, etc.) que reinterpreta la música asturiana al traviés de la mestura de distintos instrumentos como la pandereta ya’l pandeiru, la guitarra elléctrica ou'l vigulín. La nuesa propuesta ía faer una llectura personal ya contemporánea de la música asturiana pero calteniendo los ritmos tradicionales pal baille dende una poética pantanosa na que quedan venceyaos soníos heterodoxos ya transfronterizos.

Rubén Bada

Rubén Bada ía ún de los músicos folk asturianos con más proyección internacional. Vigulineru, guitarrista ya conocíu principalmente por tocar el bouzouki, formóu parte de grupos como Xéliba, Corquieu, N´Arba ou Dixebra. Collaboróu cola Banda Gaites Llacín, Mari Luz Cristobal Caunedo, Tejedor o DRD. Anguaño, forma parte del grupo L-R ya Calea. Ía parte de la banda de Rodrigo Cuevas ya colabora habitualmente con Eva Tejedor, Silvia Quesada ou la Banda Gaitas el Trasno de Cuaña. Destacan las sos collaboraciones col grupu irlandés At First Light ya’l gaiteru John McSherry, el gaiteru gallego Anxo Lorenzo ou l’irlandés Barry Kerr. Tamién participóu nel primer discu en solitariu de Sylvain Barou. Ente los sos reconocimientos, Rubén ganóu un primer premiu nel concursu de pareyas instrumentales del “Muséu del pueblu d’Asturies” ya cuenta con un premiu “Amas” de la crítica musical asturiana como meyor instrumentista.

Leticia Baselgas

Leticia González ía panderetera ya tien abonda esperencia nel ámbitu del folclore asturianu. Formóu parte de colectivos d’investigación etnográfica ya de cultura tradicional d’ente los que destacan el Conceyu de Cultura Tradicional Vezos Astures. Tamién participóu n’outras formaciones de música asturiana como Trovando Trío. Collaboróu activamente con agrupaciones de baille tradicional como Xeitu ya trabayóu cola Asociación de Música Tradicional Muyeres hasta 2016, siendo parte del so equipu directivu. Uno de los sos oxetivos ía averar la pandereta asturiana a outros estilos musicales al traviés de collaboraciones con formaciones como Nacho Vegas, Lorena Álvarez ou Pablo und Destruktion. Anguaño, ía miembro del grupu de post-folk-asturianu L-R col que lleva espublicaos dos discos ya tamién de Calea xunto a Rubén Bada ya Silvia Quesada.

¿Cómo puedes ayudanos?

Tol presupuestu que recaudemos tará destináu íntegramente a la edición ya producción del disco de vinilu.

Puedes collaborar con nós de munchas maneras: Dende mercar l’arte ensin vinilo, especialmente pensáu pa la xente que quier tener l’oxetu pero nun tien sistema pa reproducillo (amás, de xuru que queda mui guapu en salón de casa a la vera los llibros) ou mercando dalgún de los packs que vos ufiertamos como recompensa.

¿Qué tipu recompesas hai?

CDs V.O.S. ya N.O.S.

Discos de vinilu de post-folk-asturianu, N.O.S. ya V.O.S.

Si nun tienes el nueso segundu discu puedes garrar, por exemplu, un pack con discu vinilu ou CD de N.O.S.

Prestábamos poder ufiertar el cd post-folk-asturianu pero agotamos la segunda edición ya, pol momentu, nun vamos faer reedición.

Entradas pa la presentación en directu del discu...

Calendariu

Recibiréis las vuesas recompensas a lo llargo del primer trimestre del añu. De xuru ente los meses de febreru ya marzu.

Presentación

Sábadu, 10 de febreru de 2024. Sala Acapulco, Xixón.

Munchas gracias, xente!

Munchas gracias por sofitar esti proyectu dende’l primer día.

+ Info

¡Síguinos nas redes sociales pa tar al día de tolas novedades!

www.l-rpostfolkasturianu.com
Facebook
Instagram
Spotify
YouTube