N.O.S., Discu vinilu

N.O.S.

DISCU DE VINILU

“Echamos bien de tiempu buscándonos y queriendo reafirmanos con palabres, con histories o con cantares. Reivindicase delantre l’espeyu nun ye fácil por cuenta’l mieu a atopanos a nós mesmos. Danos mieu mirar y que nos miren. Danos mieu atopar la verdá escondida. Sicasí, el reflexo nun ye amenaza: revela, respuende y multiplica. Mirar ye un acto valiente. Mirémonos y atrévamonos a alcontranos, a reconocenos y a caltenenos vivos. Devuélvamos el valor a les palabres, a les histories, a los cantares. Busquémonos. Nun cuartu con espeyu nunca taremos solos.”

Esti ye'l manifiestu que da forma al nuestru proyectu N.O.S.: Un discu mui especial y esperáu nel que llevamos trabayando más d'un añu y mediu.

N.O.S. fala de lo difícil que ye ponese delantre l'espeyu o, lo que ye lo mesmo, de lo difícil que ye alcontrar una voz propia y se-y fiel.

N.O.S. vio la lluz el pasáu 25 de xunu gracies a una campaña de Verkami na que collaboraron más de 220 mecenes. Nestos dos meses de vida de N.O.S. L-R vivimos una montonera conciertos y presentaciones en directu nos que vosotres/os tamién participasteis (baillando, glayando y cantando) y que nos ficieron mui felices.

Ya sabéis...

El proyectu N.O.S. apuesta pola música asturiana dende una perspectiva actual y averada a les creaciones más contemporánies. Queremos siguir fomentando nueves formes d'integrar na sociedá les músiques de raigañu. Asina, les nuestres idees siguin siendo les mesmes coles qu'entamábamos la nuestra aventura musical nel 2016: entender y difundir la música asturiana como daqué vivo y en tresformación; un bien común qu'evoluciona colos tiempos y les tendencies. Too ello dende la nuestra manera única y personal d'entender la música; dende la nuestra sonoridá.

¿Qué buscamos?

Agora y, a petición de munchos de vosotros y vosotres, entamamos esta nueva aventura de financiación col oxetivu de poder editar una edición especial de N.O.S. en discu vinilu.

A lo llargo los últimos meses, fuisteis munchos y munches los que vos interesasteis por esti formatu. Asina qu'esta campaña ta especialmente diseñada pa vosotros y vosotres; tamién pa tolos que quieran esfrutar de la nuestra música nesti formatu tan especial.

Si la campaña nun finara con ésitu, la edición en vinilu nun sedría posible, asina que la publicación de N.O.S. en formatu vinilu ta dafechu nes vuestres manes.

Agradeceríamosvos muncho la vuestra ayuda.

Sobre nosotros

L-R somos un dúu formáu por Leticia Baselgas (voz y percusión) y Rubén Bada (guitarres elléctriques y efectos) que tien como oxetivu reinterpretar la música asturiana al traviés de la fusión de dos instrumentos aparentemente mui estremaos: la pandereta y la guitarra elléctrica. El nuestru principal oxetivu ye facer una llectura personal y contemporánea de la música asturiana pero calteniendo los ritmos tradicionales pal baille averando otros soníos más heterodoxos y tresfronterizos.

Rubén Bada

Rubén Bada ye ún de los músicos folk asturianos con más proyección internacional. Violinista, guitarrista y conocíu principalmente por tocar el bouzouki, formó parte de grupos como Xéliba, Corquieu, N´Arba, Dixebra. Colaboró cola Banda Gaites Llacín, Mari Luz Cristobal Caunedo, Tejedor o DRD. Anguaño forma parte del grupu L-R, Aú?, Alce y Navaya. Ye parte de la banda de Rodrigo Cuevas y collabora con artistes como Silvia Quesada, Alfredo González, Eva Tejedor o la Banda Gaitas el Trasno de Cuaña. Destaquen les sos collaboraciones col grupu irlandés At First Light y el gaiteru John McSherry, el gaiteru gallego Anxo Lorenzo o el irlandés Barry Kerr. Tamién participó nel primer discu en solitariu de Sylvain Barou. Ente los sos reconocimientos, Rubén ganó un primer premiu nel concursu de pareyes instrumentales del “Muséu del pueblu d’Asturies” y cuenta con un premiu “Amas” de la crítica musical asturiana como meyor instrumentista.

Leticia Baselgas

Leticia González (Baselgas) ye una de les pandereteres más reconocies del folklore asturiano. Formó parte de diversos colectivos d'investigación etnográfica y de cultura tradicional de ente los que destaca el Conceyu de Cultura Tradicional Vezos Astures. Fue miembru de grupos como Menaxatruá o Trovando Trío y tamién formó parte de la xunta directiva de la Asociación de Música Tradicional “Muyeres”. Nos últimos años llevó la pandereta asturiana a otros estilos musicales, collaborando con formaciones como Lorena Álvarez, Losone o Pablo und Destruktion.

¿Y el post-folk-asturianu?

El post-folk-asturianu fue el títulu del nuestru primer trabayu discográficu; tamién ye una etiqueta o hashtag que cualesquier puede usar; pero sobre too el post-folk-asturianu ye pa nós una atitú crítica, ye activismu y amor incondicional pola música asturiana.

¿Cómo puedes ayudanos?

Tol dinero que recaudáu tará destináu dafechu a la edición y producción del discu vinilu.

Esti proyectu de Verkami ta especialmente pensáu pa aquelles/os que quieran sentir N.O.S. nun formatu tan especial como ye'l vinilu.

¿Con qué vamos recompensate?

CDs post-folk-asturianu y N.O.S.

Discos de vinilu de post-folk-asturianu y *N.O.S. *

Si entovía nun tienes el nuestru primer discu puedes escoyer el pack con discu vinilu o CD de post-folk-asturianu.

Calendariu

Vais recibir les vuestres recompenses a lo llargo del últimu trimestre l'añu: ente'l mes de payares y avientu; siempre que la empresa producción y les condiciones sanitaries d'anguañu dexen cumplir colos plazos marcaos.

+ Info

¡Síguenos nes redes sociales pa tar al tantu de toles nuestres novedaes!

www.l-rpostfolkasturianu.com
Facebook
Instagram
Spotify
YouTube