N.O.S.

N.O.S.

Demientes l'encierru obligáu que vivimos, L-R tuvimos la suerte de tar xuntos, creando y criando al mesmu tiempu. Esti confinamientu foi la esperiencia total. Parimos munches coses nueves. Ñacieron sensaciones. Dexamos muncho atrás. Ficímonos muncho más fuertes y llibres pero, sobre too, ñació una cosa per importante que ya taba dientro de nós dende facía bien tiempu: el proyectu N.O.S.

Dempués del nuestru primer averamientu al post-folk nel que facíamos mención a la "voz ensin nome" -una referencia a les intérpretes y compositores que munches veces queden escondíes tres de la mesma pallabra "tradición"-, en N.O.S. queremos siguir les dinámiques de la tradición oral creando melodíes y lletres basaes nes nuestres vivencies. Asina, el nuestru oxetivu ye siguir la llínia creativa d'aquelles muyeres (y homes) que deprendíen ya inventaben cantares reformulándolos y adaptándolos a les sos vides; un patrimoniu que ye y sigui siendo tresmitíu de forma híbrida de xeneración en xeneración.

El proyectu N.O.S. sigui apostando pola música tradicional asturiana dende una perspectiva actual y averada a les nueves creaciones contemporanees. L'oxetivu ye esfrutar de la música tradicional y, del mesmu mou, fomentar nueves maneres d'integrar na sociedá les músiques de raigañu.

Con too ello, les bases de L-R siguin siendo les mesmes: entender y difundir la música tradicional asturiana como daqué vivo y en constante tresformación; un bien común qu' espoleta colos tiempos y les tendencies.

Sobre nosotros

L-R somos un dúu formáu por Leticia Baselgas (voz y percusión) y Rubén Bada (guitarres lléctriques y efectos) con una idega bien clara: reinterpretar la música tradicional asturiana dende la nuestra particular visión y la nuestra poética personal. Too ello, al traviés de la mesura de instrumentos estremaos como la pandereta y la guitarra lléctrica. El nuestru principal oxetivu ye facer una llectura propia y contemporánea de la música asturiana pero calteniendo los ritmos tradicionales pal baille ya mesturando otros soníos más averaos al blues, al jazz o al rock.

¿Y el post-folk-asturianu?

El post-folk-asturianu fue el títulu del nuestru primer trabayu discográficu; tamién ye una etiqueta o hashtag que cualesquier puede usar; pero sobre too el post-folk-asturianu ye pa nós una atitú crítica, ye activismu y amor incondicional pola nuestra música: la música tradicional asturiana.

Rubén Bada

Rubén Bada ye ún de los músicos folk asturianos con más proyección internacional. Violinista, guitarrista y conocíu principalmente por tocar el bouzouki, formó parte de grupos como Xéliba, Corquieu, N´Arba, Dixebra. Colaboró cola Banda Gaites Llacín, Mari Luz Cristobal Caunedo, Tejedor o DRD. Anguaño forma parte del grupu L-R, Aú?, Alce y Navaya. Ye parte de la banda de Rodrigo Cuevas y collabora con artistes como Silvia Quesada, Alfredo González, Eva Tejedor o la Banda Gaitas el Trasno de Cuaña. Destaquen les sos collaboraciones col grupu irlandés At First Light y el gaiteru John McSherry, el gaiteru gallego Anxo Lorenzo o el irlandés Barry Kerr. Tamién participó nel primer discu en solitariu de Sylvain Barou. Ente los sos reconocimientos, Rubén ganó un primer premiu nel concursu de pareyes instrumentales del “Muséu del pueblu d’Asturies” y cuenta con un premiu “Amas” de la crítica musical asturiana como meyor instrumentista.

Leticia Baselgas

Leticia González (Baselgas) ye una de les pandereteres más reconocies del folklore asturiano. Formó parte de diversos colectivos d'investigación etnográfica y de cultura tradicional de ente los que destaca el Conceyu de Cultura Tradicional Vezos Astures. Fue miembru de grupos como Menaxatruá o Trovando Trío y tamién formó parte de la xunta directiva de la Asociación de Música Tradicional “Muyeres”. Nos últimos años llevó la pandereta asturiana a otros estilos musicales, collaborando con formaciones como Lorena Álvarez, Losone o Pablo und Destruktion.

¿Cómo puedes ayudanos?

Cualesquier aportación ye importante. Tol dinero que recaudemos tará destináu dafechu a la grabación, edición y producción del discu.

Pa que puedas facete una idega, equí ta el nuestru presupuestu:

El nuestru oxetivu: Algamar 2500 euros.

_Gastos de grabación y producción: 1100 euros

_Gastos de post-producción: 1000 euros

_Gastos pa les recompenses: 500 euros

¿Con qué vamos recompensate?

Chapes y pegatines

CD

Bolses

Mascarielles

Packs post-folk

Si tovía nun tienes el nuestru primer discu puedes escoyer el pack post-folk col discu vinilu o CD de post-folk-asturianu.

Calendariu

El nuevu discu de L-R espublizarase nel mes de...

Ochobre de 2020

*Recibiréis les vuestres recompenses a lo llargo del mes d'avientu.

+ Info

www.l-rpostfolkasturianu.com
Facebook
Instagram
Spotify
YouTube