❗️ In order to use Verkami you must do it from another browser. Install or enter from: Microsoft Edge, Chrome or Firefox. Microsoft has stopped updating the Internet Explorer browser you are using and it is no longer compatible with most websites.

Llibru-discu "La banda sonora de la oficialidá" de la Xunta pola Defensa de la Llingua Asturiana

Historia del Conciertu pola Oficialidá cuntada con grabaciones, artículos y testos inéditos que repasen 30 años de música y reivindicación.

XDLA

A project of

Category

Created in

112%
9
days
161
Patron
4.491€
From 4.000€
Contribute to the project

Esti llibru-discu qu'edita la Xunta pola Defensa de la Llingua Asturiana tien una función doble. Per un llau, festexar los 30 años del "Conciertu pola Oficialidá", el festival más importante y duraderu de música n'asturianu.

Pel otru, siguiendo la historia de la Xunta y afondando na vinculación de la música cola reivindicación llingüística n'Asturies, axunta material inédito d'estos 30 años, amás de sorpreses pensaes a costafecha pa la ocasión: semeyes del conciertu, cartelos, artículos y collaboraciones literaries, grabaciones históriques, los singles de Músicos pola Oficialidá...

Manifestación pola Oficialidá del 21 d
Manifestación pola Oficialidá del 21 d'abril del 2018

Va presentase nel espectáculu del mesmu nome'l sábadu 14 d'avientu del 2019 nel Teatru Palacio Valdés d'Avilés.

Les recompenses

La recompensa básica y principal ye'l propiu discu-llibru La banda sonora de la oficialidá.

Otra parte de les recompenses ta centrada nel actu de presentación del día 14 d'avientu: puen consiguise la entrada pal actu nel Palacio Valdés y pases pa la espicha d'esi mesmu día nel edificiu de la Pescadería Vieya d'Avilés.

Amás, tamién pues escoyer opciones con material más clásico: singles de Músicos pola Oficilidá o les últimes camisetes editaes pola Xunta.

La Xunta pola Defensa de la Llingua Asturiana

La Xunta pola Defensa de la Llingua Asturiana ye una asociación histórica na reivindicación llingüística n'Asturies.

Caravana pola Oficialidá. Mieres, xineru del 2017
Caravana pola Oficialidá. Mieres, xineru del 2017

Ye la entidá organizadora de les 30 ediciones del Conciertu pola Oficialidá, los actos del Premiu Andrés Solar, manifestaciones, caravanes y marches pola oficialidá, Acampa-llingua (campamentu infantil-xuvenil n'asturianu), cursos d'asturianu p'adultos, etc. Editó llibros, informes y guíes sobre asuntos rellacionaos col asturianu, amás de munchos singles (con Músicos pola Oficialidá) y el CD "L'Asturianu vive, la llucha sigue".

¿Pa qué necesitamos les perres?

La Xunta ye una organización que funciona gracies a l'aportación mensual de los sos socios y socies. Sicasí, dacuando entama activides con unos gastos muncho mayores, como, por exemplu, esti discu y l'espectáculu de presentación. Como nos paecía que nun podíemos dexar pasar esta ocasión, y viendo la cantidá de material tan prestoso que teníemos, decicimos facer esti micropatrociniu pa poder sacar el proyectu alantre.

Les perres vamos dedicales a tol llabor d'edición del productu final.

-Escoyeta de documentación, testos y archivos sonoros.
-Diseñu y maquetación de testos y imáxenes.
-Masterización de grabaciones históriques.
-Edición de tol material sonoro.
-Impresión y fabricación del llibru-discu.
-Actu de presentación (espaciu, soníu, músicos, espicha, publicidá...).
-Recompenses

Llibru-discu "La banda sonora de la oficialidá"
Llibru-discu "La banda sonora de la oficialidá"

Calendariu aproximáu

L'actu de presentación va facese'l 14 d'avientu del 2019 nel Teatru Palacio Valdés d'Avilés.

Les entraes pal actu de presentación puen mercase nos puntos anunciaos.
Si la merques equí, vas poder recoyela nel Teatru Palacio Valdés esi mesu día.

Por razones organizatives, vamos tratar d'apurrir bona parte de les recompenses tamién el 14A. Amás, a partir de xineru vamos facer los unvios postales pa la xente qu'escueya esta modalidá. Tamién vamos poner un horariu de recoyida na sede de la Xunta n'Uviéu.

+ Info

Facebook
Twitter
Instagram
Web

Xunta pola Defensa de la Llingua Asturiana
Cai Cimavilla 15, Escalera A, 1.u C
33003 Uviéu - ASTURIES
info@exunta.org

FAQ

There are none published yet.

Do you have any other queries or questions?

9 comments

If you are already a sponsor, please Log in to comment.

  • iana

    iana

    14 days

    Otra pa nun dir sola...😊

  • iana

    iana

    14 days

    🙋

  • maite rozada

    maite rozada

    17 days

    Yo yá! 💙

  • Xelu Xardón

    Xelu Xardón

    21 days

    Y la moza

  • Xelu Xardón

    Xelu Xardón

    21 days

    Un convidáu

  • Xelu Xardón

    Xelu Xardón

    21 days

    Otra más

  • Xelu Xardón

    Xelu Xardón

    21 days

    ¡Xá, xá, xá: OFICIALIDÁ!

  • Francisco Gutierrez Fernandez (Pachi)

    Francisco Gutierrez Fernandez (Pachi)

    about 1 months

    ¡¡¡L'ASTURIANU LLINGUA OFICIAL YÁ!!!

  • Ochobre_34

    Ochobre_34

    about 1 months

    L'asturianu llingua oficial darréu!

#25 / ¡Cumplimos el primer oxetivu!

¡Lleguemos hai unos díes al mínimu que necesitábemos pa poder encarar la publicación del llibru-discu "La banda sonora de la oficialidá": 4.000 euros!

Pero'l micropatrociniu sigue. Hasta'l mesmu día 14, entá pues mercar nél el llibru-discu, les entraes pal espectáculu de presentación y/o pa la espicha-fiesta posterior.
Ah, y tamién pues ayudar a esti proyectu de la Xunta na opción "gabitu" si ye que nun vas poder venir.

Llibru-discu "La banda sonora de la oficialidá"
Llibru-discu "La banda sonora de la oficialidá"

#24 / Natalia Suárez Ríos, presentadora de "La banda sonora de la oficialidá"

La encargada de conducir la gala de "La banda sonora de la oficialidá" va ser l'avilesina Natalia Suárez Rios, que yá collaboró con nós na presentación del Proyectu 2018 en Xixón. Natalia conoz bien el teatru Palacio Valdés, onde interpretó una montonera de personaxes na so faceta d'actriz. Ella va tar n'escenariu guiando la marcha del espectáculu.

Agora yá sabéis cuasi too de "La banda sonora de la oficialidá". Yá conocéis la banda, yá sabéis qué intérpretes van dir saliendo a lo llargo de la gala... pero va haber más coses. Mercái yá la entrada y veníi a descubrir lo que vos tenemos preparao.

Natalia Suárez Ríos
Natalia Suárez Ríos

#23 / Esta ye la Banda 14A

A tolos y toles cantantes que fuimos anunciando estes selmanes hai qu'añedir un grupu d'intérpretes bautizáu pa la ocasión como Banda 14A.

Van ser los encargaos d'acompañalos musicalmente. Trátase d'una esbilla de dellos de los meyores y más afamaos músicos del panorama sonoru asturianu, provinientes d'estilos como'l rock, el folk o'l jazz.

Esta superbanda va tar formada por Wilón de Calle (batería), Antón Ceballos (baxu), Álvaro Bárcena (guitarres), Rubén Bada (buzuqui, vigulín y guitarres), Javier Tejedor (gaita y acordión) y Sam Rodríguez (teclaos). Conócense de sobra n'Asturies y tienen una trayectoria llarga y esperimentada.

L'espectáculu «La banda sonora de la #oficialidá» va ser una ocasión única y irrepetible pa ver y oyer enriba d'un escenariu una muestra del meyor talentu musical que tenemos n'Asturies.

¿Vas perdelo, ho?
¡Nun pues faltar, né!

Banda 14A
Banda 14A

#22 / ENTRAES PA "LA BANDA SONORA DE LA OFICIALIDÁ"

Como queremos disponer d'entraes pa vender na taquilla del Palacio Valdés el 14 d'avientu, vamos recoyer les que tán a la venta nos chigres. El llunes 9 va ser l'últimu día que se van poder comprar nos puntos que yá conocéis: El Cafetón, Cervecería Cabanón, El Calendoscopio (Avilés); L'Esperteyu, Lord Vader (Uviéu); Cuévano (La Pola Siero); La Semiente (L'Entregu); La Llocura, L'Abellugu (Mieres); Café Trisquel y Canteli Sidrería (Xixón).

Así qu'entainái p'asegurar que nun quedáis ensin ella. 

Recordámosvos que podéis siguir mercando les entraes dientro d'otros llotes nel micropatrociniu que tenemos na plataforma Verkami. 

Por razones organizatives y p'aforrar la fila en taquilla, la xente que sacó yá nel Verkami la entrada pal espectáculu y/o pa la espicha-fiesta pue garrala yá si pasa pel local de la Xunta esti miércoles 4 y el miércoles 11, de 7 a 9 de la tarde (Cai Cimavilla, 15, Escalera A, 1.u C, Uviéu).

Entraes "La banda sonora de la oficialidá"
Entraes "La banda sonora de la oficialidá"

#21 / ¡Cartelu del 14A!

Presentámosvos el cartelu oficial de "La banda sonora de la oficialidá". Pero nun escaecer qu'hai más sorpreses, que non too ta nel cartelu.

Podéis sacar la entrada nos puntos de venta anunciaos peles redes, amás de mercala dientro d'otros llotes nel micropatrociniu qu'entamemos nesta páxina de Verkami. Y, por si fora poco, depués hai una fiesta-espicha na Pescadería VIEYA, tamién podéis sacar la entrada nel Verkami.

Ayudáinos compartiendo'l cartel nes vuestres redes sociales.

#20 / Merce Santos, el 14A n'Avilés

Merce Santos tuvo una montonera de veces n'escenariu del Conciertu pola Oficialidá: primero con Folkgando y depués con La Bandina. Anque agora toca con una formación más pequeña, La Bonturné, Merce siempre punxo neses bandes el soníu característico de la zanfona o gaita de rabil. Trátase d'un instrumentu tradicional que ta na música folk asturiana dende los primeros discos de la so historia y ella ye una de les poques intérpretes n'Asturies que caltién viva la so presencia. 

Merce, cola so gaita de rabil, va tar tamién nesta "Banda sonora de la oficialidá". Con ella completamos esti percorríu pelos intérpretes que van dir xubiendo a les tables del Palacio Valdés n'Avilés el 14A. Pero fáltanos un elementu fundamental que ser la siguiente sorpresa nesti espectáculu.

¡Tai sollertes y díi sacando la entrada, que yá queda menos!

Merce Santos
Merce Santos

#19 / Xosé Antón "Ambás" , el 14A n'Avilés

Xosé "Ambás" ye una de les cares conocíes de la nuestra música gracies al so pasu pela TPA con programes como "Camín de cantares" o "Camín", pero, más allá d'esa popularidá mediática, al cantante de Grau sofítalu un trabayu de campu escomanáu fechu a lo llargo y ancho de la nuestra xeografía pa rescatar tola bayura del patrimoniu oral asturianu.

Ambás va tar n'escenariu del Palacio Valdés por esto, claro, pero tamién porque tuvo en doce ediciones del Conciertu pola Oficialidá, con N'Arba yá dende 1999, con Tuenda dende'l 2007 y hasta una vez con Cataruxare, nel 2017. Ensin Ambás, "La banda sonora de la oficialidá" nun diba ser lo mesmo.

Xosé Antón "Ambás"
Xosé Antón "Ambás"

#18 / David Varela, el 14A n'Avilés

David Varela ye un músicu con una trayectoria bien llarga. Empezó mui mozu cola so acordión y amás demostró una gran versatilidá. La prueba ta nes sos participaciones nos conciertos pola oficialidá: 18 veces tocó, que sepamos, dende primeros de los noventa con Lliberdón y Merlín hasta'l 2016 con Pop Piquiñín, pasando per Llaímo, Folkgando y La Bandina.

Nesta formación punxo voz a cantares famosos como'l quilométricu "Na caleya" y agora sigue colos sos compañeros ayeranos nun formatu más pequeñu en La Bonturné. David nun podía faltar a la cita del 14A.

¿Tenemos que date más razones pa nun perder un espectáculu como'l que tamos entamando n'Avilés?

David Varela
David Varela

#17 / Xel Pereda, el 14A n'Avilés

Cuando se fixo'l primer Conciertu pola Oficialidá, en 1989, Llan de Cubel tenía na cai namás un discu, "Deva" (1987). Daquella les bandes folk cuntábense colos deos de media mano y la formación entamada d'a caballu ente Uviéu y Cuideiru nun podía faltar aquel día na Pista la Esposición. Volvieron tar cinco veces a lo llargo de la década de los noventa, con un vocalista y guitarra nuevu dende 1995, Xel Pereda.

Nel 2008 foi la postrer vez que Llan de Cubel tocó nel nuestru conciertu. Daquella Xel taba embarcáu amás nun proyectu discográficu tan interesante como Lucas XV.

Tantos conciertos depués, el 14A vamos tener a Xel Pereda nel espectáculu "La banda sonora de la oficialidá".

Va ser emocionante, yá veréis.

Xel Pereda
Xel Pereda

#16 / Leticia Baselgas, el 14A n'Avilés

El papel de la pandereta na música tradicional ye indiscutible, pero naide podía figurase va unes décades los caminos nuevos que diba abrir esti instrumentu pa la música asturiana actual.

La panderetera Leticia González, más conocida como Leticia Baselgas, ye una muestra d'esa renovación. Col dúu L-R, que forma col guitarrista Rubén Bada, tocó nel últimu Conciertu pola Oficialidá en Xixón, pero tamién echó una mano a la Xunta tocando los dos nuna Plaza la Catedral d'Uviéu enllena de xente nel final de la manifestación del 21 d'abril del 2018. Leticia tenía que tar nel espectáculu "La banda sonora de la oficialidá" y va tar.

¡Apúntate pal 14A n'Avilés!

Leticia Baselgas
Leticia Baselgas

#15 / Daniel García de la Cuesta, “Dani Lliberdón”, el 14A n'Avilés.

A Daniel García de la Cuesta llámenlu munchos "Dani Lliberdón", porque esti multiinstrumentista xixonés tuvo nel nacimientu de la formación folk del mesmu nome depués de pasar per otra banda mítica, Beleño.

Pero Dani, músicu inquietu, tamién tocó n'otros grupos como Güercu o Zapica. Actuó nel Conciertu pola Oficialidá con Lliberdón ocho veces, nel periodu dende 1992 hasta'l 2004, y quiximos cuntar con él pa "La banda sonora de la oficialidá" nel Palacio Valdés el 14A. La respuesta foi positiva, como siempre que llamamos a los músicos asturianos.

El sábadu 14 d'avientu vémonos n'Avilés.

Daniel García de la Cuesta, "Dani Lliberdón"
Daniel García de la Cuesta, "Dani Lliberdón"

#14 / Pablo Martínez (Desakato), el 14A n'Avilés

La evolución de la música cantada n'asturianu y en gallego-asturianu tien una característica interesante y natural poles circunstancies sociollingüístiques que vivimos: ente los grupos asturianos que canten en castellanu, cada vez son más los que se deciden a usar les llingües propies d'Asturies.

Desakato, un grupu de punk-rock de muncha proyección estatal, ye un casu exemplar. Siempre incluye dalgún tema n'asturianu nes sos xires y ondequiera que los entrevisten fuera d'Asturies siempre recuerden la situación de la nuestra llingua.

Pablo Martínez, el so cantante, va tar con nós tamién el 14A, pa ufiertanos una sorpresa enriba les tables del Palacio Valdés. Si s'acaben les entraes, depués nun te quexes.

Pablo Martínez (Desakato)
Pablo Martínez (Desakato)

#13 / Santi Caleya, el 14A n'Avilés

Santi Caleya lleva munchos años na música asturiana. El gaiteru y saxofonista ayerán, primero con Folkgando a últimos de los noventa y depués con La Bandina, acompañónos nada menos que nueve veces nos conciertos pola oficialidá: la primera, en 1998; la última, nel 2013. Por eso quiximos qu'él punxera'l soníu de la gaita nel espectáculu "La banda sonora de la oficialidá" nel teatru Palacio Valdés d'Avilés.

Si quies ver a Santi, entaína a sacar la entrada pal 14A.

Santi Caleya
Santi Caleya

#12 / La entrada pa la espicha, recompensa nueva.

Atendiendo a delles peticiones que nos llegaron, incluyimos una opción nueva nel micropatrociniu de "La banda sonora de la oficialidá": la posibilidá de mercar la entrada pa la fiesta-espicha que va poner el ramu a la xornada nel edificiu de la Pescadería Municipal vieya.

Aparte, recordamos que se pue escoyer más d'una opción y que tamién vos podéis axuntar ente cinco y aforrar unos eurinos garrando'l pack Banda Sonora XL (5 llibru-discu, entrada, espicha y camiseta).

#11 / Lluci Palomares, el 14A n'Avilés

Corquiéu tocó cuatro veces nel Conciertu pola Oficialidá: la primera nel 2001 y la última, na postrer edición. Lluci Palomares ye la vocalista de la banda de Ribeseya dende va unos años y anguaño collaboró cola Xunta poniendo la voz nel cantar "Falando", de Músicos pola Oficialidá.
Cuando la llamemos pa cantar nel espectáculu "La banda sonora de la oficialidá", nun lo pensó dos veces. 

Esa ye l'actitú de compromisu que la xente de la música asturiana tuvo a lo llargo d'estes trés décades. El discu-llibru y la cita n'Avilés quier ser un homenaxe al papel qu'elles y ellos tuvieron poniendo música a la reivindicación llingüística. 

¡Nun quedes ensin la entrada! ¡Participa tamién nel micropatrociniu pa echanos un gabitu!

Lluci Palomares
Lluci Palomares

#10 / Xune Elipe, el 14A n'Avilés

La imaxe de Xune blincando n'escenariu forma parte de la iconografía de los conciertos pola oficialidá.

Nun diben ser igual esos finales de fiesta ensin el soníu potente de Dixebra y la xente de la Xunta xubiendo cola pancarta a baillar "La danza".
La banda avilesina empezó l'andadura nel conciertu en 1989, nel primeru, y faltó poques veces más a la cita: en ventiún ocasiones más pudimos velos n'escenariu.

D'esi primer conciertu fala Xune nuna de les collaboraciones que formen parte del llibru-discu "La banda sonora de la oficialidá". 

Xune tamién punxo voz a una montonera de cantares de Músicos pola Oficialidá, así que nun podía faltar a la cita del Palacio Valdés esti 14A.

¡Tampoco nun pues faltar tu! ¿Sacasti yá la entrada?

Xune Elipe
Xune Elipe

#09 / Yá tán a la venta les entraes pal espectáculu "La banda sonora de la oficialidá"

Pues mercales nestos sitios:
+El Cafetón, El Cabanón, El Calendoscopio (Avilés).
+L'esperteyu, Lord Vader (Uviéu).
+El Cuévano (La Pola Siero).
+La Semiente (L'Entregu).
+La Llocura Llibrería-Café, L'Abellugu (Mieres).
+Café Trisquel, Sidrería Canteli (Xixón).

El preciu ye cuasi simbólicu: cinco euros.
Si quies ayudar económicamente nesti proyectu, a manera de fila cero, pues participar nel micropatrociniu na opción "gabitu".
Tamién pues sacar la entrada dientro d'un llote col llibru-discu (o tamién con entrada a la espicha-fiesta).

Animámoste, por razones loxístiques, a que saques la entrada primero del 14A.

Entraes pal 14A
Entraes pal 14A

#08 / Ramón Blanco, el 14A n'Avilés

La historia de la música n'asturianu nun se pue escribir ensin Los Berrones.

La Xunta pola Defensa de la Llingua Asturiana tuvo la suerte de tenelos cuatro veces nos conciertos pola Oficialidá: 1996, 2001, 2008 y 2010.

Pa esti festexu de los 30 años que ye "La banda sonora de la oficialidá" nun podía faltar la voz inconfundible de la formación de Tolivia, Ramón Blanco, que va tar enriba l'escenariu del Palacio Valdés d'Aviles nun espectáculu que promete.

¡Apúntate, collabora nel micropatrociniu y espárdilu!

Ramón Blanco
Ramón Blanco

#07 / ¡Tamos cuasi al 50%!

Yá tamos llegando al ecuador, pero fáltesnos tu.

El micropatrociniu qu'abrimos va diez díes pa financiar el nuestru proyectu "La banda sonora de la oficialidá" ta llegando a la metá del oxetivu, pero precisamos que tola xente que tais pola reivindicación de los nuestros derechos llingüísticos collaboréis cola vuestra aportación.

Fai l'ingresu que puedas. Tienes pa escoyer: dende una aportación desinteresada mínima hasta la recompensa de tener el llibru-discu, pasando per otres posibilidaes como sacar amás la entrada pal espectáculu o tamién pa la fiesta posterior, col aliciente amestáu d'una camiseta o un pack de singles. Tamién podéis axuntavos ente delles persones y mercar un llote de cinco de cada.

Necesitamos que nos eches un gabitu pa lo que tamos entamando, ¡que va ser mui gordo! 😉

Llibru-discu "La banda sonora de la oficialidá"
Llibru-discu "La banda sonora de la oficialidá"

#06 / Miguel Fernandi, "Burilo", el 14A n'Avilés

Trayemos a Miguel Fernandi, “Burilo”, por trés razones.

La primera, porque col so grupu Skama la Rede participó una montonera de veces nos conciertos pola Oficialidá: dende’l 2005 hasta l’añu pasáu, nada menos qu’ocho.
Tamién hai que falar d’él porque nos escribió un testu pal llibru-discu recordando la so esperiencia nes grabaciones del colectivu Músicos pola Oficialidá.
Y la tercer razón, porque vamos poder velu cantando nel Palaciu Valdés el 14A.

¡Animáivos a venir a La banda sonora de la oficialidá y a patrocinar l’espectáculu/llibru-discu/fiesta!

Miguel Fernandi, "Burilo"
Miguel Fernandi, "Burilo"

#05 / Rodrigo Cuevas, el 14A n'Avilés

La evolución de la música asturiana nestes décades últimes ye indiscutible y los Conciertos pola Oficialidá demostráronlo edición a edición.

Rodrigo Cuevas ye una prueba d’esa evolución. Cantó va dos años en Xixón nel XXIX Conciertu y va volver tar con nós na #OficialidáBSO nel Palacio Valdés d’Avilés esti 14A. ¿Vas perdelo?

Merca la to entrada

Rodrigo Cuevas
Rodrigo Cuevas

#04 / Mariluz Cristóbal Caunedo, el 14A n'Avilés

Yá llovió dende qu’aquel 12 de xunu de 1992 Mariluz Cristóbal Caunedo xubió al escenariu pa cantar na Plaza del Fontán d’Uviéu nel tercer Conciertu pola Oficialidá.
Ente otres, cantó l’añada “Debaxo d’una panera”. Ye una de les grabaciones históriques que vas poder oyer nel discu-llibru “La banda sonora de la oficialidá”.

Pero tamién vas poder vela n’escenariu del Palacio Valdés d’Avilés esti 14A.
¡Participa nel patrociniu!

Mariluz Cristóbal Caunedo
Mariluz Cristóbal Caunedo

#03 / Delfo Valdés, el 14A n'Avilés

Los Conciertos pola Oficialidá nun diben ser igual ensin La Tarrancha.

Delfo Valdés, el so cantante, que tamién tien collaborao en singles de Músicos pola Oficialidá, nun podía faltar el 14A.

¡Collabora pal llibru-discu/espectáculu/fiesta!

¡La #BSOficialidá va garrando forma!

Delfo Valdés con La Tarrancha
Delfo Valdés con La Tarrancha

#02 / Anabel Santiago, el 14A n'Avilés

Anabel Santiago actuó nel Conciertu pola Oficialidá nos años 2001 y 2002. Cuasi dos décades depués, vuelve con nós esta figura de la música asturiana p'actuar n'escenariu del Palacio Valdés d'Avilés.
¡Participa nel Verkami de la Xunta y merca la to entrada!

Anabel Santiago
Anabel Santiago

#01 / ¡Empieza la Banda Sonora de la Oficialidá!

Yá ta en marcha'l micropatrociniu del nuestru proyectu La banda sonora de la oficialidá.
Un discu-llibru y ¡muncho más!

Participa cola cantidá que puedas y ayúdanos a movelo. Tolos xestos, anque seyan pequeños, son una ayuda grande p'algamar l'oxetivu.

Copia l'enllaz de la campaña (https://vkm.is/oficialidabso) y espárdilu nes tos redes. Pues usar el hashtag #BSOficialidá.

¡Vamos a por ello!

Dexámoste tamién equí un recuerdu del últimu Conciertu pola Oficialidá n'Uviéu, el del añu 2016 na Plaza la Catedral.
Ye un videu del cineasta Pablo A. Quiroga Prendes cola música de Nacho Vegas.

5€
8 backers
Gabitu
  • Apetezme ayudar.
Estimated delivery December 2019
20€
20 backers
Banda Sonora
  • Llibru-discu "La banda sonora de la oficialidá".
  • PDF colos testos y el diseñu.

(entrega del llibru nel actu del 14A n'Avilés o na sede de la Xunta n'Uviéu a partir de xineru del 2020).

Estimated delivery December 2019
25€
43 left (of 50)
Espicha
  • Espicha na Pescadería Vieya d'Avilés el 14A
Estimated delivery December 2019
25€
313 left (of 350)
Banda Sonora Orixinal
  • Llibru-discu "La banda sonora de la oficialidá".
  • PDF colos testos y el diseñu.
  • Entrada pal espectáculu y presentación nel Teatru Palacio Valdés d'Avilés el 14A.

(entrega del llibru nel actu del 14A n'Avilés o na sede de la Xunta n'Uviéu a partir de xineru del 2020).

Estimated delivery December 2019
25€
33 backers
Banda Sonora Península
  • Llibru-discu "La banda sonora de la oficialidá".
  • PDF colos testos y el diseñu.
  • Unviu península.
Estimated delivery December 2019
30€
2 backers
Banda Sonora Europa
  • Llibru-discu "La banda sonora de la oficialidá".
  • PDF colos testos y el diseñu.
  • Unviu Europa.
Estimated delivery January 2020
35€
1 left (of 10)
Músicos pola Oficialidá
  • Llibru-discu "La banda sonora de la oficialidá".
  • PDF colos testos y el diseñu.
  • Pack singles Músicos pola Oficialidá (¡Fala!, Un pasu alantre, Arguyosu, Garra la palabra, Ye lo que nos pasa y Asturlletric).

(entrega del llibru nel actu del 14A n'Avilés o na sede de la Xunta n'Uviéu a partir de xineru del 2020).

Estimated delivery December 2019
35€
2 backers
Banda Sonora Sistema Solar
  • Llibru-discu "La banda sonora de la oficialidá".
  • PDF colos testos y el diseñu.
  • Unviu a tolos puntos del Sistema Solar.
Estimated delivery January 2020
47€
37 left (of 60)
14 d'avientu
  • Llibru-discu "La banda sonora de la oficialidá".
  • PDF colos testos y el diseñu.
  • Entrada pal espectáculu y presentación nel Teatru Palacio Valdés d'Avilés el 14A.
  • Espicha na Pescadería Vieya d'Avilés el 14A.

(entrega del llibru nel actu del 14A n'Avilés o na sede de la Xunta n'Uviéu a partir de xineru del 2020).

Estimated delivery December 2019
290€
5 left (of 5)
Banda Sonora XL
  • 5 llibros-discu "La banda sonora de la oficialidá".
  • PDF colos testos y el diseñu.
  • 5 entraes pal espectáculu y presentación nel Teatru Palacio Valdés d'Avilés el 14A.
  • 5 entraes pa la espicha na Pescadería Vieya d'Avilés el 14A.
  • 5 camisetes de la Xunta.

(entrega del llibru nel actu del 14A n'Avilés o na sede de la Xunta n'Uviéu a partir de xineru del 2020).

Estimated delivery December 2019
30€
20 patrons (sold out)
Banda Sonora XDLA
  • Llibru-discu "La banda sonora de la oficialidá".
  • PDF colos testos y el diseñu.
  • Camiseta de la Xunta.

(entrega del llibru nel actu del 14A n'Avilés o na sede de la Xunta n'Uviéu a partir de xineru del 2020).

Estimated delivery December 2019
Cookies help us to offer our services. Continuing to browse entails acceptance of their use.