Queres que a rapazada teña unha publicación feita na nosa terra?
Se pensas que a mocidade precisa de medios feitos na súa lingua axúdanos a facelo realidade. Hai preto de 200,000 rapaces e rapazas entre os seis e quince anos de idade que non contan cunha revista que lles fale desde a súa mesma realidade.
Ti podes contribuir a que a teñan!
A revista OINK! nace coa intención de que a rapazada galega poda descubrir o mundo na súa lingua.
Ti podes axudar a que exista unha publicación infantil-xuvenil en galego!
Queres que se lles fale de xeito ameno aos máis novos e con respecto ás súas capacidades?
Colabora para que lles podamos amosar os milleiros de cousas interesantes que bolen ao seu redor. O noso satélite está listo, espreitando no espazo: as galaxias, os calendarios do mundo ou como funciona a nosa memoria foron xa visitados polo satélite. Que será o seguinte?
Só ti podes facer que siga facendo novos achados.
Tamén entrevistamos a grandes figuras da nosa contorna, para que pícaros e pícaras coñezan en primeira persoa as súas historias, á xente con pegada que hai entre nós. E ti, tamén queres deixar pegada?
Secunda OINK! e falaráslle ao futuro das nosas vilas e cidades.
Queremos descubrirlles ás familias a realidade máis próxima con reportaxes de actualidade e novas saídas do cortello. Pero ademais das reportaxes sempre hai un oco na revista para aprender fedellando, para fochicar creatividade plástica ou bular experiencias científicas para facer xuntos, grandes e pequenos.
Se non fose abondo con estes contidos, en OINK! tamén hai unha manchea de banda deseñada! Unha rolada de mestres do lápis que a cada número dan vida a uns personaxes que farán a ledicia dos cativos (e non tan cativos).
Vivimos en tempos difíciles e dinnos que non hai sitio para unha revista feita en galego para os bacoriños. Non quedes sen facer nada, coopera con este proxecto e demostrarás que hai xente dabondo que devece por unha publicación coma OINK!
Queres ser dos pais máis molóns da bisbarra ou dos familiares máis queridos nas paparotas dos domingos?
Coa túa achega poderemos publicar seis números de OINK! O diñeiro que precisamos dará para producir, imprimir e remitir cada dous meses un novo número da revista, cargada de sorpresas, banda deseñada orixinal e contidos desenvolvidos con tino.
Se non acadamos o obxectivo marcado en Verkami os agoiros serán certos. Teremos feito todo o posible para non aceptar a realidade do noso tempo. Sen xente que desexe unha revista coma OINK! é mellor quedar no cubil e agardar que escampe...
Pero logo non te queixes de que non hai nada para a rapazada en galego!
Non deixes escapar este momento para marcar a diferencia, únete a nós:
35 comentarios
Si ya eres mecenas, Inicia sesión para comentar.
Revista Oink!
Autor/a
Ola Mar. En primeiro lugar queremos darche as grazas por querer apoiar o proxecto. Como ves non logramos acadar o obxectivo que marcamos en Verkami. O futuro da revista é incerto, iniciamos movementos para facer que continúe por outro camiño pero aínda non sabemos se o lograremos. Agardamos facer público en breve o destino final da publicación. Mentres tanto, se non tes os exemplares xa publicados da revista, podes facerte con eles na páxina web: www.revistaoink.com/tenda
Moitas grazas
Mar
Eu quería apoiar o proxecto mais o prazo xa está pechado nesta plataforma. Como fago?
Revista Oink!
Autor/a
Ola Ru, podes facerte cós números anteriores, dende o 0 ata o 4, na opción de 15€ das recompensas.
Moitas grazas polo teu interese.
Un saúdo
Ru
Ola, eu quero facerme cos números anteriores, é posible?
Revista Oink!
Autor/a
Boas noites Merche. Moitas grazas por facer unha achega e axudar a que OINK! siga adiante.
Se logramos chegar ao obxectivo en Verkami porémonos en contacto con tódalas persoas que deron o seu apoio para pedir os datos para as recompensas.
Un saúdo.
Merche Espiño
Acabo de facer unha achega, pero non me pregunta a quen quero que fagan mención. Como se indica tal cousa? Merche
Revista Oink!
Autor/a
Bos días Alexandra.
A recompensa de 30€ son 6 números novos.
En relación aos números xa publicados tes a opción de 15 ou 20€.
Moitas grazas por querer axudar á revista.
Un saúdo.
Alexandra
Boas!
Os seis números da recompensa de 30€ son os 5 que xa hai máis o próximo, ou podes ser os seis novos? É que a min interésame ter os vellos e máis os novos, co que collería unha de 20€ para os vellos e outra de 30€ para os novos, ou non é así?
Revista Oink!
Autor/a
Bo día Shemari. Miramos o que comentas pero semella que non se pode. Unha posible solución é que nos mandes un correo indicando cal era a recompensa que colliches e nós faremosche o reintegro do teu aporte se logramos o Verkami. Deste xeito podes seleccionar outra recompensa.
Moitas grazas polos ánimos e alegrámonos que che gustasen os primeiros catro números.
Un saúdo
shemari
Moi boas! Eu fíxenvos unha achega, e quixera trocala por outra maior, pero non vexo como. Pódese facer?
Saúdos e moito ánimo, gustáronme moito os 4 primeiros números e espero que haxa máis!