Walter Benjamin XX. mendeko literatura kritikari eta filosofo nagusienen artean dago. Autore honek humanitateetako alor ezberdinei egindako ekarpena handia eta bere obra aberats bezain zabala den arren, euskal irakurleok ez dugu oraindik funtsezko lan horiek gure hizkuntzan irakurtzeko aukerarik.
Gabeziaz jabetuta, Sans Soleil argitaletxetik hutsune hori betetzeko lanean ari gara. Walter Benjaminen bi artikulu antologia euskaraz argitaratu nahi ditugu.
Lehen antologia, aditu baten hitzaurreaz gain, literaturari buruzko hurrengo artikuluek osatuko dute: “Franz Kafka”, “On Some Motifs in Baudelaire”, “On the Image of Proust” eta “The Task of the Translator”.
Bigarren antologian, aldiz, aditu baten hitzaurreaz gain, historia eta filosofiaren inguruko artikuluak aurkitu ahalko ditugu: “The Work of Art in the Age of Mechanical Reproduction”, “Theses on the Philosophy of History”, “Critique of Violence”, “Little History of Photography” eta “Experience and Poverty”.
Garazi Arrula Ruiz, Mikel Babiano, Maialen Berasategi, Amaia Donés Mendia, Mikel Igartua, Teresa Pradera, Danele Sarriugarte, Iñaki Segurola eta Gaizko Urturi itzultzaileak arduratuko dira artikuluak euskaratzeaz.
NORTZUK GARA?
Sans Soleil arte kritikan espezializatutako irabazi asmorik gabeko argitaletxea da. Honen barruan, “Txinpartak” arte gaiei buruzko erreferentziazko lanak euskaraz argitaratzen dituen bilduma da. Euskarazko arte kritikako liburuen argitalpena bultzatzeko xedez sortutako egitasmoa da. Artea, zinema, argazkigintza, literatura, filosofia… dira “Txinpartak” bildumak aztertuko dituen gai nagusiak. Gure gogoa, irakurleen konplizitatea eta adituen partaidetza lagun, helburua artearen alor ezberdinak aintzat hartuko dituen erreferentziazko corpus zabal eta aberatsa osatzea da.
ZERTARAKO BEHAR DUGU ZURE LAGUNTZA?
Sans Soleil irabazi asmorik gabeko argitaletxea dela kontuan izanik, 3.000€ behar ditugu:
Itzultzaileei haien lana ordaindu ahal izateko.
Inprenta- eta bidalketa-gastuetarako.
NOIZ ARGITARATUKO DIRA?
Ondo bidean, 2014 amaieran bi antologiak kalean izango dira.
KONTAKTUA
Edozein zalantza, galdera edo proposamenik izanez gero, helbide honetara idatz iezaguzu eta pozik erantzungo dizugu: [email protected]
0 iruzkin
Proiektuaren mezenas bazara, Saioa hasi iruzkina egiteko