"131 AZA. Palindromo ariketak" liburuaren inprimaketa.

Liburuak 131 palindromo ariketa jasotzen ditu, gehienak azken urte hauetan Zerorajasoa blogean plazaratutakoak eta baita inoiz argitaratu gabeko bost ariketa ere.

Palindromo ariketak enigma bereziak dira: pistei jarraituz ezkutuko palindromoa da aurkitu behar dena. Zerorajasoa blogean asteleheneroko aza dira ariketok.

Bazen garaia lan hau liburuan biltzekoa, eta ahalik eta txukunen.

NOLAKO LIBURUA

Liburuak 170 orrialde ditu: Sarrera, ariketok nola egiteko azalpenarekin, aurkibidea, 131 azak edo palindromo ariketak, eta liburuaren bukaeran, erantzunak.

Liburua karratua da, 15x15cm. Gainera, "Kaiola" animazioa ere badauka barnean.

Hauxe da azala:

Liburuarekin batera liburuxka bat ere badoa palindromoen itzulpenekin. Gehigarri honek 131 palindromoen itzulpenak jasoko ditu lau hizkuntzetan: gaztelera, frantsesa, ingelesa eta katalana.

500 aleko tirada izango da liburuarena. Verkami kanpaina honetan parte hartzen duzuenon artean banatuko dira. Gainontzekoek liburutegi eta liburudendetarako bidea hartuko dute.

DIRUA ZERTARAKO IZANGO DEN

3000€ hauekin inprimatze lana ordainduko da, bai liburuarena eta baita itzulpenen liburuxkarena ere. Baita itzulpengintzako gastuak ere. Oparietarako poltsa serigrafiatuak ere diru horrekin ordainduko dira, eta jakina, bidalketa gastuak ere bai.

EPEAK

Apirilaren erdialdean kanpaina hau ondo bukatzen bada, hau da, dirua jasotzea lortuz gero, maketazioari azken ukituak eman (mezenasen izenak sartu) eta inprentara!

Maiatza hasieran aleak zuon artean banatzen hasteko moduan egongo naizela uste dut. Postaz jaso ordez eskura jaso nahi baduzu, bi aukera izango duzu hurrengo liburu aurkezpen ofizialetan:

-Maiatzaren 12an Ermuko Euskal Liburu eta Disko Azokan.

-Maiatzaren 17an Club Palindromista Internacional-aren topaketan, L'Hospitalet de Llobregat-en.

Eskerrik asko.