Pa la creación del Llar La Llegra n'Uviéu (Asturies)
La Llegra nació en febreru de 2014 dientro del CSOA La Madreña col oxetivu de convertise nun llugar pal alderique y l’acción a comuña de la izquierda soberanista asturiana. Tres dellos meses de xenerar idees y desendolcar propuestes, d’axuntar sensibilidaes, d’interrellacionanos con otres persones y colectivos… aportó la especulación y mandó parar.
La llóxica vertical, homoxeneizadora, neolliberal y patriarcal impúnxose a la nuestra propuesta colectiva, al nuestru modelu horizontal de construyir rellaciones humanes, cultura y ociu pa toes aquelles que nun queremos baillar al so son. Desagospiaron el CSOA La Madreña en xunu. Pero suel dicise que los suaños nun se puen desagospiar; por eso La Llegra va abriendo espaciu.
Queremos siguir teniendo un llar autoxestionáu n’Uviéu. Un puntu d’alcuentru nel que xenerar alderique, discursu y trabayu colectivu; nel que visibilizar y normalizar a la izquierda soberanista asturiana: plural y abiertu a otros movimientos sociales y culturales; participativu y xestionáu horizontalmente ente toles persones que quieran formar parte d’él.
Queremos tresformar Asturies; y que’l Llar La Llegra seya una semiente que faiga pol cambiu políticu, social y económicu que necesitamos pal futuru del nuestru país y pa construyir otru mundu posible.
¿Qué vamos facer nel Llar La Llegra?
N’Uviéu, na cai Postigu Baxu 40, va asitiase’l llocal de La Llegra. Un espaciu que nagua por ser:
Un puntu d’alcuentru ente toles persones y organizaciones que formen parte de la izquierda soberanista asturiana.
Un espaciu d’alderique, de xeneración de discursu, de trabayu colectivu.
Un llocal participativu, xestionáu horizontalmente ente les persones que quieran formar parte d’él.
Un espaciu plural; abiertu a xente d’otros movimientos sociales, culturales y políticos del ámbitu de la izquierda y del asturianismu cultural.
Un escaparate col que normalizar y da-y visibilidá a la izquierda soberanista asturiana.
Un llugar pa la dinamización social nel que desendolcar charres, conciertos, talleres, proyecciones, xintes…
Un llar d’ociu y socialización, de construyir rellaciones horizontales ente les persones qu’entren nél a echar un bon ratu.
Un llocal col que rellacionanos col vecindariu y nel qu’empobinar iniciatives pal barriu que se reflexen na construcción d’un modelu de ciudá más participativu y popular.
Un sitiu nel que potenciar la industria cultural asturiana al traviés de la venta de llibros y discos; amás de distribuir materiales de colectivos sociales asturianos.
Un espaciu pa construyir soberanía alimentaria dándo-y puxu al consumu de productos ecolóxicos producíos nel país.
¿Pa qué necesitamos el vuestru sofitu?
Yá tenemos el llocal, tenemos les idees, tenemos les ganes. Agora namás necesitamos el to sofitu y que nos ayudes a qu’esti espaciu seya vidable económicamente. ¿Échesnos un gabitu? Necesitamos axeitar l’espaciu, por eso queremos algamar los 3000 euros colos que face-y frente al presupuestu d'obra:
Llicencia d’obra: 350€
Permisos: 200€
Documentación técnica y planimetría:150€
Demolición + medios auxiliares: 400€
Remates d'alcuentros en suelos y techu: 200€
Pieslle metálicu: 500€
Pintura y otros materiales: 350€
Instalación llétrica: 1000€
TOTAL: 3000€
Calendariu aproximáu
Les obres van entamar en cuantes arranque'l crowdfunding. Con nuevos sofitos, podremos dir avanzando n'axeitar el Llar La Llegra. Cuntamos con que tol procesu de acabación enantes del 31 d'avientu de 2014.
Alrodiu les recompenses
Les recompenses van preparase en cuantes acaben los 40 díes del crowdfunding. Van entregase de dos formes:
Unvíos a les direcciones postales que queráis (asumimos nós los costes)
Nuna folixa na que les entregaremos personalmente a tola xente que s'avere a por elles. Amás, vamos convidamos a una si venís esi día por ello.
¿Quién somos y qué ficimos hasta agora?
La Llegra nació como un espaciu dientro del CSOA La Madreña d’Uviéu col oxetivu de llegar a ser un puntu d’alcuentru y llugar d’alderique pa la esquierda soberanista asturiana, caracterizada históricamente pola división ente les distintes corrientes y les dificultaes pa conectar cola sociedá. Mentanto duró l’espaciu dientro de La Madreña, desendolcamos les siguientes actividaes.
Folixa/presentación del Espaciu La Llegra
Charra sobre soberanía enerxética y proyección de “Cenizas del cielo”
Collaboración con Ixuxú Asturies-Euskal Herria elkartea nel so primer aniversariu
Proyección del documental “Whore’s glory”
Presentación del llibru “La huerta ecológica asturiana”
Alderique sobre soberanía alimentaria y proyección del curtiu “Tiempu de medrar”
Conciertu del Día les Lletres Asturianes con Vrienden y La Kuruxa 2.0
Convocatoria de concentración (prohibida por Delegación de Gobiernu) n’alcordanza a los fechos del 25 de mayu de 1808
En xunu una orden xudicial desagospia’l CSOA La Madreña, pero les persones y colectivos que participamos en La Llegra siguimos cola nuestra actividá. Nestos meses tuvimos, sacando alantre una bayura d’actividaes y debatiendo cuestiones que nos esmolecen. Dalgunes d’elles son:
Parrillada popular en Noreña
Organización de la manifestación y de los actos unitarios del 8 setiembre
Edición de pañuelos por unes fiestes
populares en San Mateo 2014Charra alrodiu’l referéndum d’independencia n’Escocia y folixa nel Centru Social La Llume
Agora l’enfotu sigue siendo’l mesmu: visibilizar el nuestru pensamientu, construyir un discursu nuevu qu’evolucione al mesmu ritmu que lo fai la sociedá asturiana y abrir pa toes un espaciu nel que medrar. Esto último ye lo que tamos a puntu d’algamar.
+ Info
Si queréis más información de La Llegra podéis mirala equí:
Facebook / Twitter / Wordpress
0 comentarios
If you are already a sponsor, please Log in to comment.